Павел Пинигин турнирын чэрчитинэн…

«Азия оҕолоро» оонньуу дуораана ситэ сүтэ илигинэ эмиэ биир улахан күрэхтэһии кэллэ. Ол курдук, от ыйын 17-21 күннэригэр олимпийскай чемпион, спорт үтүөлээх маастара Павел Пинигин аатынан «Саха сирин тимир суоллара» тэрилтэ бирииһигэр көҥүл тустууга уолаттарга (16-гар диэри саастаахтарга) Бүтүн Россиятааҕы аһаҕас турнир уонна 18-гар диэри саастаахтарга норуоттар икки ардыларынааҕы түһүлгэ ыытыллар.

Бу күрэхтэһиилэр чэрчилэринэн бүгүн Саха сирин уонна Монголия эдэр бөҕөстөрүн икки ардыларыгар табаарыстыы көрсүһүү буолла. Тустуу 9:3 ахсаанынан олохтоохтор кыайыыларынан түмүктэннэ. Биһиги уолаттарбытын тренер Вячеслав Данилов сүбэлээн-амалаан көбүөргэ киллэрдэ. Уолаттарбыт бары даҕаны үчүгэйдик туһуннулар. Комментатор Егор Яковлев эппитинэн, монголлартан хас да уол дойдуларын чемпионнара, сотору кэминэн ыытыллар аан дойду күрэхтэһиитигэр кыттарга бэлэмнэнэ сылдьар эбит.

Көрсүһүүгэ биэс хапсыһыыга очукуонан ыраастык кыайсыы бэлиэтэннэ. Саамай бүтэһик киирсиигэ Ньурба тустууга кыһатын иитиллээччитэ, Саха сирин чемпиона Михаил Борисов утарсааччытын үөһэттэн быраҕан түһэрэн, ыраастык кыайда. Табаарыстыы көрсүһүүгэ бу соҕотох ыраас кыайыы буолла.

Аны бу уолаттар, Павел Пинигин турнирыгар хайдах тусталларын кэтээн көрүөхпүт, сыаналыахпыт.

Саха сирэ – Монголия 9:3

45 кг: Антон Григорьев – Бадарч Очирхуу 0:5

48 кг: Александр Соломонов – Батмунх Буянжаргал 10:0

51 кг: Вадим Прядезников – Одбаяр Анар 4:1

55 кг: Роман Кириллин – Зоригто Батмэнд 2:1

60 кг: Максим Григорьев – Баасанхуу Пурэвбаатар 9:6

65 кг: Артур Попов – Энхтувшин Тэлмэн 10:0

65 кг: Уйгун Бурцев – Бадбаяр Золжаргал 2:1

71 кг: Анатолий Иванов – Тамир Бямбарагчаа 11:1

71 кг: Назим Сафаров – Ганболд Хангалбаяр 1:1+

80 кг: Дмитрий Павлов – Цэрэнпунцаг Ганбат 0:10

80 кг: Артур Слепцов – Гантулга Анхбаяр 13:0

110 кг: Михаил Николаев – Амар Гэндэнжамц +/- туше.

Күрэхтэһии иннинэ маннык табаарыстыы көрсүһүүнү кэпсэтэн тэрийбит, спорду таптааччылары сэргэхсиппит Саха Республикатын уолаттарга сүүмэрдэммит хамаандатын тренердэригэр улахан махтал! Түгэнинэн туһанан эттэххэ, улахан дьоҥҥо маннык, Саха сирэ – Бурятия хамаандаларын табаарыстыы көрсүһүүлэрин тэрийэр киһи төһөлөөх үчүгэй буолуо этэй?!

Дьэ, аны сарсыҥҥыттан биэс күн устата «Өрөгөй» Спорка бэлэмнэнии киинигэр тустуу! Бастаан үс күн 16-гар диэри саастаахтар Бүтүн Россиятааҕы аһаҕас турнирга ким бастыҥын быһаарсыахтара. Онтон субуота уонна өрөбүл күннэргэ – 18-гар диэри саастаахтарга норуоттар икки ардыларынааҕы турнир буолуоҕа. Бука барыгытын тустууга ыҥырабыт!

Петр ПАВЛОВ.

Ааптар видеоҕа устуута, хаартыскаҕа түһэриитэ.