Павел Пинигин: «Саха тустуута инникилээҕин көрдөрдүлэр»

От ыйын 17-21 күннэригэр олимпийскай чемпион, аан дойду үс төгүллээх кыайыылааҕа, ССРС спордун үтүөлээх маастара Павел Павлович Пинигин аатыгар, “Саха сирин тимир суоллара” тэрилтэ бирииһигэр көҥүл тустууга уолаттарга бастаан Бүтүн Россиятааҕы аһаҕас, онтон норуоттар икки ардыларынааҕы турнирдар ыытыллан түмүктэннилэр.

Биһиги Павел Павловичтан, күрэхтэһии уонна тэрээһин туһунан туох санаалаҕын туоһуластыбыт.

-Биһиги уолаттарбыт ааспыттааҕы күрэхтэһиитээҕэр чаҕылхайдык туһуннулар. Ким көхтөөхтүк тустар, ким көбүөргэ күүстээхтик үлэлиир, ким тустуу албастарын баһылаабыт – ол хаһан баҕарар кыайар. Тустуу ити үөрүйэҕэ оҕо саастан үөскүүр. Көбүөргэ бастакы хардыыттан. Оҕолор кэм-кэрдии быһыытынан сайдан иһэллэр. Ону быйылгы, биһиги эдэрдэрбит ситиһиилэрэ даҕаны көрдөрөр. Лев Павлов уонна Андрей Мидловец Россия түһүлгэтигэр бастаан баран, салгыы Европа күрэхтэһиитигэр кыайдылар. Ол аата, биһиэхэ инникигэ эрэл баар. Ити биһигини үөрдэр.

Бүгүҥҥү финалларга Анатолий Иванов үчүгэй тустууну көрдөрөн, кыахтаахтык бастаата. Киниэхэ биһиги “Турнир бастыҥ бөҕөһө” анал бирииһи туттардыбыт, салгыы кыайыыларга алҕаатыбыт. Бу курдук, манна ситиһиилээхтик тустубут уолаттар салгыы эдэрдэргэ Роман Дмитриев, онтон улахаттарга Дмитрий Петрович Коркин турнирдарыгар бэйэлэрин ааттарын ааттаталларыгар баҕарабыт. Спортсмен сайдыыта барыта ситимнээх буолуохтаах.

Тэрээһин үчүгэй. Спорт министиэристибэтэ уонна «Дохсун» спорткомплекска базалаах Спорка инники эрэллэри бэлэмниир республикатааҕы киин үлэһиттэрэ эппиэтинэстээхтик сыһыаннаһан үлэлээтилэр. Маннык күрэхтэһиилэри тэрийэн, бэлэмнээн ыытыыга кинилэр үөрүйэхтэннилэр да диэххэ сөп.

Бу күрэхтэһии генеральнай спонсора – «Саха сирин тимир суоллара» тэрилтэ. Генеральнай дириэктэр Шимохин Василий Владимирович бэйэтэ тустуук буоларын быһыытынан, спорка эрэ буолбакка, республика сайдыытыгар араас эйгэҕэ барытыгар көмөлөһөр, сүрдээх инициативалаах, өйдөөх, дойдутун туһугар ыалдьар үрдүк таһымнаах салайааччы диэн сыаналыыбын.

Инникитин бу күрэхтэһиини өссө киэҥ хабааннаахтык тэрийэн ыытыыга кэскиллээх санаалар бааллар. Ол олоххо киирэрин туһугар туруулаһан үлэлэһиэхпит.

Петр ПАВЛОВ.

Ааптар хаартыскаҕа түһэриитэ.