Оноҕостор тыалы-кууһу аахсыбакка куһуурдулар

«Азия оҕолоро» норуоттар икки ардыларынааҕы VIII спортивнай оонньуу оҕунан ытыыга күрэхтэһиитэ «Юность» стадиоҥҥа икки күн устата ыытылынна. Күрэхтэһиигэ Беларусь, Азербайджан, Таджикистан, Кыргызстан дойдуларын уонна Россия регионнарын эдэр спортсменнара кытыннылар.  

Бүгүн Микс көрүҥэр Кристина Дрозд уонна Владимир Ким састааптаах Саха сирин хамаандата быһаарыылаах көрсүһүүгэ төһө да тыаллаах күн буоллар, бэргэн ытыылары көрдөрөн, утарсааччыларын – Сибиирдээҕи федеральнай уокурук спортсменнарын баһыйан, бастакы миэстэни ылары ситистэ.

Онтон кыргыттарга хамаанданан киирсиигэ Кристина Дрозд, Светлана Колодезникова, Аина Васильева састааптаах Саха сирин хамаандата үһүс бириистээх миэстэни былдьаһыыга Сибиирдээҕи федеральнай уокурук хамаандатын кытта ытар суолга таҕыстылар. Итиэннэ ыалдьааччылар кыайыыга кынаттыыр үөгүлээһиннэринэн, сүрдээх тыҥааһыннаахтык барбыт ытыыга, тыалы-кууһу аахсыбакка кыайыылааҕынан таҕыста.

Онон охчуттарбыт Саха сирин сүүмэрдэммит хамаандатыгар бэйэлэрин ситиһиилэринэн күүс-көмө буоллулар.

Петр ПАВЛОВ.

Ааптар хаартыскаҕа түһэриитэ.