Олимпиадаҕа биэс спортсмеммыт кыттар

Парижка сайыҥҥы XXXIII Олимпийскай оонньуулар үгэннээн ыытылла тураллар. Бу, түөрт сылга биирдэ ыытыллар улахан тэрээһиҥҥэ саха спордун биэс иитиллээччитэ кыттар.

Тустууктар Владимир Егоров Хотугу Македонияттан, Георгий Окороков Австралияттан, Виктор Рассадин Таджикистантан, Айаал Лазарев уонна марафоҥҥа Сардаана Трофимова – Кыргызстантан. Олимпиада көҥүл тустууга күрэхтэһиитэ атырдьах ыйын 8-10 күннэригэр буолар. Онтон дьахталлар марафоҥҥа сүүрүүлэрэ Оонньуулар бүтэһик күннэригэр – атырдьах ыйын 11 күнүгэр ыытыллар.

Билигин спортсменнарбыт бары анал эрчиллиини бардылар. Бары даҕаны улахан спорка улахан үөрүйэхтээх, ситиһиилээх спортсменнар. Айаал Лазаревка бу үһүс Олимпиадата буолар. Бу бэйэтэ, ураты ситиһии. Олимпийскай оонньууларга сүүмэрдээһин хайдах курдук ыараханын бэйэҕит билэҕит, мээнэ киһи кыттыбат.

Сардаана Трофимова өссө ааспыт Оонньууларга кыттыан сөптөөх этэ да, политика орооһон – кыттыбакка хаалбыта. Уоннааҕылар киһи-аймах спорка сүдү тэрээһинигэр бастакы кыттыылара. Билгэлээһин быһыытынан спортсменнарбыт бары даҕаны олимпийскай мэтээлгэ суоттаналлар, күүстээхтэр ахсааннарыгар киирсэллэр. Ону барыта Олимпиада тыына уонна спортсменнарбыт бэйэлэрин дьолуолара быһаарыаҕа.

Өссө Беларусьтан тустуук Арыйаан Тютрин Олимпиадаҕа кыттар путёвканы ылбытын үрдүнэн, политикаҕа сыбаан, кини оннугар Владимир Егоровы киллэрдилэр. Маны тэҥэ МОК биһиги дзюдоисткабыт Надежда Татарченконы Оонньууларга кыттарга көҥүл биэрбитэ эрээри, Россия дзюдоҕа хамаандата Парижка барартан эрдэ аккаастаммыта.

Санатан эттэххэ, быйылгы Олимпийскай оонньуулар – аан дойдутааҕы быһыы-майгы хаһааҥҥытааҕар даҕаны сытыырхайан турар кэмигэр ыытыллар. Арҕааҥҥы дойдулар уонна Аан дойдутааҕы олимпийскай кэмитиэт (МОК) куомуннаһан баран, Россия уонна Беларусь хамаандаларын Олимпиадаҕа киллэрбэтилэр. Ол да буоллар, гимнэ уонна былааҕа суох кыттыыга Россия уонна Беларусь биирдиилээн спортсменнара зачету таһынан күүстэрин холоһуохтара.

Олимпиецтарбытыгар ситиһиилээх кыттыыны баҕарабыт! Биир өттүнэн ылан көрдөххө, Саха сириттэн Олимпиадаҕа биэс спортсмен кыттара, республикаҕа спорт билигин ханнык таһымҥа турарын көрдөрөр дии саныыбын. Саха Республиката – Россияҕа физическэй култуураҕа уонна спорка биир үчүгэй үлэлээх регионунан буоларын ити чахчылар даҕаны туоһулууллар.

Таһымы намтаппакка, өссө үрдүк кирбиилэри ыларга! Саха спордун былааҕын өрүү күөрэччи тутарга! 

Петр ПАВЛОВ.