“Манчаары оонньууларыгар” бэлэмнэнии үлэлэрэ

“Манчаары оонньуулара” диэн успуорт төрүт оонньууларынан аатаммыт күрэхтэһии ааспыт үйэ 1968 с. тэриллиэҕиттэн 56 сыл ааста. Үйэ аҥарын куоһурар саха успуордун улахан күрэхтэһиитэ, олох сайдыытынан сылтан сыл кэҥээн, таһыма үрдээн иһэр.

Эһиилги оонньуулар Ытык Тааттаҕа ыытыллаары тураллар, бу иннинэ 1999 с.  ыытыллыбыта. Оонньууларга барыта түөрт уон хамаандаттан 1200 киһи кыттыыны ылбыта биллэр. Онон таатталар Саха Олимпиадатынан биллэр XXII “Манчаары оонньууларын” иккис төгүлүн ыытарга бэлэмнэнэллэр. Ол курдук, от ыйын 2 күнүгэр оонньуулар таблоларын уота үөрүүлээх быһыыга-майгыга олохтоохтор кыттыылаах умайбыта.

Биир сыллаах түбүктээх үлэни туоһулуур уот саҕыллыаҕыттан, улуус, нэһилиэк дьаһалталара, улуустааҕы “Манчаары оонньууларын” дирекцията – оонньуулар ыытыллар сирдэринэн икки күн үлэлээтилэр. Кэмииссийэ тутулла турар стадиону, ипподром сирин,  кэлиигэ-барыыга сүрүн уулуссалары, пилорамалары, атын да территориялары көрдө.  Нэһилиэнньэ тупсахайдык туттан олоруута бастакы оруолу ылара саарбаҕа суох.

Бэҕэһээ күнүс Ил Дархан Айсен Николаев тэрийэр кэмитиэти кытта Оонньуулары ыытыы, тэрийии туһунан мунньахтаата. Айсен Сергеевич тутулла турар успуорт комплексын, А.Е.Мординов аатынан лицейы уонна стадион тутууларын хаамыытын билистэ. Кини бэлиэтээбитинэн, анал эбийиэктэри тутууну эрэ болҕомтоҕо ылбакка, өрөмүөн, уулуссалар благоустройстволарын үлэлэрин дьүөрэлээн оҥоруу, ыытыы, норуоту биир санааҕа киллэрэн тэрийдэххэ, түмтэххэ, успуорт бырааһынньыга үрдүк таһымҥа ыытыллыаҕын эттэ.

Бүгүн улуус баһылыга Айаал Бурцев архитектурнай экспедиция кыттыылаахтарын, архитектор Ирина Алексееваны, “Градо” архитектурнай хампаанньа салайааччытын Иван Кычкины уонна Лорина Гуляеваны кытта көрүстэ. Экспедиция Тааттаҕа иккис сырыыта, кинилэр чуолаан улууспут нэһилиэктэрин эйгэтин тупсарыыга үлэлииллэр. Экспедиция “улахан кыраттан саҕаланар” диэнинэн салайтаран, элбэх бырайыагы олоххо киллэрэргэ бэлэмнэр.

Бу курдук күнтэн күн Оонньууларга хардыылыыбыт. Ол эбэтэр, “Манчаары оонньуулара” успуорт бырааһынньыга эрэ буолбакка, олох сайдыытын, тэтимин көрдөрөр улахан  суолталаах кэрэһит буолар.

Вера КАНАЕВА, суруналыыс.

Таатта.