Кыайыылаахха бирииһэ туттарылынна

Европа футболга чемпионатын кэмигэр спорт бэриниилээх ыалдьааччыта Петр Гордеев тэрийиитинэн биһиги сайтпытыгар викторина-конкурс биллэриллибитэ. Бүгүн, ол конкурс кыайыылааҕын кытта көрсөн, балаһыанньа быһыытынан, бирииһэ – «Забота-Арчы» хаһыат (редактор Виктор Эверстов) олохтообут «Камелек» тэрилтэ оҥорбут сахалыы иһитэ туттарылынна.  

– Марианна, конкурска кыайбыккынан эҕэрдэ! Баһаалыста, кылгастык бэйэҥ тускунан билиһиннэр эрэ.

– Мин аатым Черкашина Марианна Ивановна. Саха Республикатын Ил Дарханын уонна Правительствотын дьаһалтатыгар специалиһынан үлэлиибин.

– Спорка сыһыаныҥ хайдаҕый?

– Чуолаан футболга сыһыаным туһунан эттэхпинэ, кэргэним футбол оонньуур этэ. Кини миэхэ интэриэһи үөскэппитэ. Кэргэним аҕата Гаврил Гаврильевич спорт бэриниилээх ыалдьааччыта, футбол, баскетбол, волейбол… барытын сүрдээҕин интэриэһиргээн көрөр уонна бу конкурска кыттарбар кини саамай улахан көмөнү оҥорбута. Гаврил Гаврильевич спорка билиитэ сүрдээх киэҥ. Бэйэм икки уоллаахпын. Кинилэр эһээлэрин холобур оҥостоллор.

Улахан уолум 7 саастаах, футболу сэҥээрэн эрэр. Бэйэтэ харбааһынынан дьарыктанар. Футбол мээчигэ атыылаһыннарбыта. Аан дойду бастыҥ футболистарын барыларын ааҕа билэр. Криштиану Роналду оонньуутун ордорор. Ити курдук, дьиэ кэргэним уонна чугастааҕы дьонум бары спорт эйгэлээхпит. Эһээлээх эбээбит билигин даҕаны аҕам саастаахтар күрэхтэһиилэригэр куруук кытталлар. Бэйэм ийэм Р.М. Дмитриев аатынан Олимпийскай эрэл училищетыгар үлэлиир. Ол иһин биһиэхэ спорт сүрдээх чугас.

Мин оскуолаҕа үөрэнэ уонна студенныы сылдьан спортивнай ориентированиенан дьарыктаммытым. Алдаҥҥа ыытыллыбыт Кыһыҥҥы спартакиадаҕа кыттыбытым. Мэтээллэрдээхпин уонна кубоктардаахпын. Оттон билигин бэйэм эрэ туспар эрчиллэбин.

– Конкурс туһунан тугу этиэххин сөбүй?

– Уопсайынан, итинник конкурстар ыытыллаллара үчүгэй. Киһи син биир, хаһан эмэ биир кэлим олохтон аралдьыйыан баҕарар. Иллэҥ кэммэр интернеккэ сайтары көрөн сонуннары эҥин көрөбүн, ааҕабын. Ити викторинаҕа кыттарбар, миэхэ Гаврил Гаврильевич сүбэлээбитэ. Боппуруостара үчүгэйдэр, интэриэһинэйдэр, сорохторугар эппиэти интернеттэн да булбаккын.

Киһи син биир бэйэтэ интэриэстээх, бэйэтэ олоҕор туох эрэ сэҥээрэр тиэмэлээх буолар. Ол иһин спорду сөбүлүүр дьон итинник конкурстары, викториналары көтүппэккэ кыттыахтарын наада. Тоҕо диэтэххэ, билбэт да буоллаххына – билэҕиҥ. Бэйэҥ билиигиҥ тургутан көрөҕүн. Тугу эрэ быһаарсан, хасыһан, ааҕан ырытаҕын.

-Марианна, өссө төгүл эҕэрдэ! Дьэ, аны “Дьулурҕаны” биллэҕиҥ, кини ыытар үлэтигэр көхтөөхтүк кыттаргар, атыттары көҕүлүүргэр баҕарабыт. Өссө да конкурстар баар буолуохтара.

Петр ПАВЛОВ.

Ааптар хаартыскаҕа түһэриитэ.