Көбүөргэ 540 эдэр бөҕөс күөн көрсөр

Бүгүҥҥүттэн «Өрөгөй» Спорка бэлэмнэнии киинигэр олимпийскай чемпион, аан дойду чемпионатын үс төгүллээх кыайыылааҕа, ССРС спордун үтүөлээх маастара Павел Павлович Пинигин аатыгар «Саха сирин тимир суоллара» тэрилтэ бирииһигэр 16-гар диэри саастаах уолаттарга көҥүл тустууга Бүтүн Россиятааҕы аһаҕас турнир саҕаланна.

Көбүөргэ 33 хамаандаттан, ол иһигэр Кыргызстантан, Монголияттан, Забайкальскай кыраайтан, Тываттан, Бурятияттан, Еврейскэй автономнай уокуруктан, Ингушетияттан, Красноярскай кыраайтан барыта 540 эдэр бөҕөс тахсан күөн көрүстэ. Хапсыһыылар үс көбүөрүнэн тигинэччи ыытылыннылар. Бүгүн 17 ыйааһыҥҥа иккилии эргиир буолла. Ордук, 48 киилэҕэ – 46, 38 уонна 52 кг ыйааһыннарга – 44-түү, 44 киилэҕэ – 43 кыттааччы баар.

Күрэхтэһии үөрүүлээх аһыллыытыгар Саха Республикатын физическэй култуураҕа уонна спорка министрэ Леонид Спиридонов, «Саха сирин тимир суоллара» тэрилтэ генеральнай дириэктэрин солбуйааччы Алексей Местников, күрэхтэһии сүрүн судьуйата Дьулустан Сивцев кыттан, оҕолору эҕэрдэлээтилэр. Сылын аайы ыытыллар үгэскэ кубулуйбут быйылгы күрэхтэһии Байкаллааҕы Амурскай магистраль тэриллибитэ үйэ аҥардаах үбүлүөйүгэр ананарын туһунан эттилэр.

Бэлиэ түгэҥҥэ эдэр кэскиллээх тустууктар Дмитрий Павловка, Уйгун Бурцевка, Ариан Винокуровка, Эрхан Куличкиҥҥа, Россия спордун маастарыгар кандидат нуорматын толорбуттарын туоһулуур анал дастабырыанньалар уонна түөскэ анньыллар бэлиэлэр туттарылыннылар.

Ол кэнниттэн хапсыһыылар салгыы ыытылыннылар. Ким кыайыы үөрүүтүн билэн, номнуо чемпион буолбут курдук өрө ыстаҥалаата, ким хотторуу хомолтотун билэн хараҕыттан уу-хаар баста…

Эдэр тустууктарга бу бастакы буһуу-хатыы буолар. Ол эрээри, бастыҥнартан бастыҥнар сиидэлэнэн финал диэки эрдээхтик хардыылаан иһэллэр. Биллэн турар, күрэхтэһии билиҥҥи хаамыытыгар киһи кими да чорбоппот. Сарсын быһа холоон эбиэттэн киэһэ, финалга тахсар иһин хапсыһыыларга кимнээх кытталлара биллиэҕэ.

Бу саастаахтарга күрэхтэһии үс күн ыытыллар. Кыайыылаахтары быһаарар бүтэһик хапсыһыылар бээтинсэҕэ буолуохтара. Онтон субуота уонна өрөбүл күннэргэ 18-гар диэри саастаахтарга норуоттар икки ардыларынааҕы турнир ыытыллыа.

Тустууну таптааччылары бука барыгытын «Өрөгөй» Спорка бэлэмнэнии киинигэр ыҥырабыт!

Петр ПАВЛОВ.

Ааптар хаартыскаҕа түһэриитэ.