Сонуннар

Футзалга Саха сирэ – иккис

«Азия оҕолоро» норуоттар икки ардыларынааҕы VIII спортивнай оонньуу мини-футболга (футзалга) күрэхтэһиитигэр барыта сэттэ хамаанда кытынна. Кинилэр, сирэй көрсүү систиэмэтинэн оонньоотулар. Күрэхтэьии аҕыс күн устата «Кыайыы 50 сыла» Спорт дыбарыаһыгар ыытылынна.

Ол курдук, быйылгы күрэхтэһиигэ Дальнай Востоктааҕы, Ураллааҕы, Сибиирдээҕи федеральнай уокуруктар, Узбекистан, Пакистан, Кыргызстан уонна Саха сирин хамаандалара күөн көрүстүлэр. Саха сирин хамаандата барыллааһын оонньууга дальнай востоктары 9:5 кыайан баран, иккис киирсиигэ уралларга 2:4 ахсаанынан хотторон кэбиспиттэрэ. Салгыы оонньууга узбектары 4:1, палестиналары 4:2, кыргызтары 9:3, сибиирдэри 16:0 ахсааннарынан кыайталаабыттара. Онон барыллааһын оонньууга ураллар кэннилэриттэн иккис буолбуттара. Манна даҕатан эттэххэ, биһиги футболистарбыт хайаларынааҕар даҕаны элбэх мээчиги киллэрдилэр – 44.

Күрэхтэһии балаһыанньатын быһыытынан, бүтэһик быһаарыылаах оонньууга икки бастыҥ көрдөрүүлээх хамаандалар: Ураллааҕы федеральнай уокурук уонна Саха сирин футболистара көрүстүлэр. Онуоха сүрдээх тыҥааһыннаах киирсиигэ кыайыыны ураллар ситистилэр, ахсаан 3:2 (бастакы тайм 1:1). Голлары киллэрдилэр: Волков, Кувакин, Казаков – Зырянов, Гаспарян.

Ураллааҕы ФО: Роман Шик, Вячеслав Антуфьев, Богдан Аришин, Дмитрий Волков, Богдан Давтян, Кирилл Деребенко, Константин Ульянов, Никита Кувакин, Анатолий Шилов, Арсений Матросов, Алексей Никитин, Денис Казаков (тренердэр – Евгений Трифонов, Евгений Волков, хамаанда салайааччыта Михаил Пантов).

Саха сирэ: Илья Гордиенко, Артём Лукин, Бабур Бейшенов, Глеб Зырянов, Алик Петров, Дьулустан Каженкин, Константин Разин, Данил Номоконов, Владислав Радов, Кирилл Погодин, Мерген Енденов, Грач Гаспарян (тренердэр – Олег Марченко, Айсен Саввин, хамаанда салайааччыта Анатолий Самков).

Күрэхтэһии түмүгүнэн үгэс быһыытынан, бастыҥ оонньооччулар быһаарыллан, кинилэргэ Саха сирин футболга федерациятын аатыттан анал бириистэр туттарылыннылар. Бастыҥ вратарь – Вячеслав Антуфьев (Урал), Бастыҥ көмүскээччи – Егор Думаев (ДВФО), Бастыҥ бомбардир – Глеб Зырянов (Саха сирэ), Бастыҥ кимээччи – Грач Гаспарян (Саха сирэ), Бастыҥ оонньооччу – Денис Казаков (Урал).

Онон түмүккэ Азия оҕолоро-2024 оонньуу футзалга кыайыылааҕынан Ураллааҕы федеральнай уокурук хамаандата буолла. Иккис миэстэни Саха сирин футболистара ыллылар. Үһүс бириистээх миэстэҕэ Дальнай Восток хамаандата тигистэ. Узбекистан – төрдүс.

Петр ПАВЛОВ.

Ааптар видеоҕа уһулуута, хаартыскаҕа түһэриитэ.  

 

 

Добавить комментарий

Ваш адрес email не будет опубликован. Обязательные поля помечены *

196897
Бүгүн : 270