Биир күрэхтэһии бүттэ. Аны саҥа түһүлгэ саҕаланна!

Албан аатырбыт тустуукпут Павел Пинигин аатынан көҥүл тустууга уолаттарга Бүтүн Россиятааҕы аһаҕас турнир түмүктэнээтин сарсыныгар, аны обургу уолаттарга норуоттар икки ардыларынааҕы турнир саҕаланна. Онон бу күннэргэ олох тустуунан олоробут. Тэрийэээччилэргэ барҕа махтал!

Уолаттар күрэхтэһиилэрин түмүгүн, видеолары, хаартыскалары Дьулурҕан анал таһаарыыларыгар көрүөххүтүн сөп.

Онтон 18-гар диэри саастаахтар күрэхтэһиилэрин туһунан билиһиннэрэр буоллахха, 38 хамаандаттан барыта 170 эдэр бөҕөс уон ыйааһыҥҥа күөн көрсөр. Ол курдук, көбүөргэ Кыргызстан, Монголия, Беларусь, Казахстан, Таджикистан бөҕөстөрө уонна Россияттан – Брянскай, Еврейскэй автономнай, Иркутскай, Калининградскай уобаластартан, Забайкальскай, Красноярскай кыраайдартан, Бурятияттан, Дагестантан, Ингушетияттан, Чечняттан итиэннэ Саха сириттэн бөҕөстөр кытталлар.

Күрэхтэһии балаһыанньатын быһыытынан, бүгүн финалга тахсааччылар быһаарыллыахтара. Онтон сарсын бастаан «санааны уоскутар» бөлөх тустуулара уонна быһаарыылаах хапсыһыылар буолуохтара.

Бэйэбитигэр кэлэн биэрбит инники кэскиллэрбит тустууга күрэхтэһиилэрин кэлэн көрөргүтүгэр, биир дойдулаахтаргытыгар ыалдьаргытыгар ыҥырабыт. Киириитэ – босхо.

«Дьулурҕан».