Биһиги сүрэхпитигэр өрүү тыыннаах буолуоҕа

// Кэриэстэбил

Бу дьыл ыам ыйын 24 күнүгэр Черкашиннар дьиэ кэргэн ыарахан сүтүктэммиттэрэ. Улахан ыал амарах аҕата, тапталлаах кэргэнэ, ытыктыыр эһээтэ Виктор Петрович Черкашин уһун ыарахан ыарыыттан биһиги кэккэбититтэн хомолтолоохтук туораабыта.

От ыйын 2 күнүгэр Виктор Петрович бу олохтон барбыта 40 хонуга туолар. Манан сибээстээн, кэриэстэбил быһыытынан кини туһунан ахтан-санаан ылыахха.

Виктор Петрович 1961 сыллаахха алтынньы 1 күнүгэр Уус Алдан оройуонун Бэрт Ууһун нэһилиэгэр уон оҕолоох Черкашиннар улахан дьиэ кэргэннэригэр үһүс оҕонон төрөөбүтэ. Оскуолатааҕы сылларыгар көҥүл тустуунан утумнаахтык дьарыктаммыта. Ол курдук, 1980 сыллаахха Ытык Күөлгэ ыытыллыбыт республикатааҕы күрэхтэһиигэ бастаабыта. Тула куоракка «Трудовые резервы» спортивнай уопсастыба уолаттарга Россиятааҕы күрэхтэһиитигэр үһүс миэстэни ылары ситиспитэ. 1985 с. Киргизияҕа Бүтүн Союзтааҕы турнирга миэстэлэспитэ, 1990 с. Н.Н. Тарскай аатынан республика чемпионатыгар 62 киилэҕэ иккис буолбута.

Виктор Петрович бэйэтин спорка олоҕор, уһун үйэлээх бөҕөс буоларын көрдөрбүтэ. Ол курдук, аҕам саастаахтарга хапсаҕайга да, көҥүл тустууга да элбэх республикатааҕы турнирдарга кыайбыта. 2013 сыллаахха Сербияҕа ыытыллыбыт бэтэрээннэргэ аан дойду чемпионатыгар боруонса мэтээли ылары ситиспитэ. 2017 с. итинник чемпионакка Болгарияҕа бэһис буолбута. 2022 с. Каспийскайга Россия чемпионатыгар пьедестал үһүс үктэлигэр тахсыбыта. Быйыл И.А. Халдеев хапсаҕайга турнирыгар бүтэһигин түһүлгэҕэ тахсан, эдэрдэргэ үтүө холобуру көрдөрбүтэ.

Виктор Петрович олоҕун тиһэх күннэригэр диэри дьиэ-уот коммунальнай хаһаайыстыба тэрилтэтигэр үтүө суобастаахтык үлэлээбитэ. 1986 сыллаахха кэргэннэнэн, үс кыыс, биир уол оҕолонон, аҕа дьолун, аҕыс сиэн тапталлаах эһээтин аатын ылбыта.

В.П. Черкашин Уус Алдан улууһун социальнай-экономическай сайдыытыгар кылаатын иһин бэлиэнэн наҕараадаламмыта. Уус Алдан улууһун Муру уонна Бэрт Ууһун нэьилиэктэрин бочуоттаах олохтооҕун аатын чиэстээхтик сүкпүтэ.

Улахан дьиэ кэргэн тапталлаах аҕата, эһээтэ, үтүө суобастаах үлэһит, күүстээх спортсмен, элэккэй киһи быһыытынан Виктор Петрович Черкашин мөссүөнэ биһиги сүрэхпититтэн сүтүө суоҕа.

«Дьулурҕан».