Азия оҕолоро-2024: Бөҕөстөрбүт биэс мэтээллэннилэр

«Азия оҕолоро» норуоттар икки ардыларынааҕы VIII спортивнай оонньуу көҥүл тустууга күрэхтэһиитэ урут хас да күн буолар эбит буоллаҕына, бу сырыыга биир күнүнэн ыытыллан түмүктэннэ.

Күрэхтэһии «Өрөгөй» Спорка бэлэмнэнии киинигэр тэлгэммит үс көбүөргэ буолла. Ахсыс оонньуу тустууга күрэхтэһиитигэр – Азербайджан, Армения, Беларусь, Казахстан, Кыргызстан, Узбекистан, Таджикистан, Сирия, КНДР, Пакистан дойдуларыттан уонна Ураллааҕы, Сибиирдээҕи, Дальнай Востоктааҕы федеральнай уокуруктар, Москва, Саха сирин икки хамаандата кытыннылар. Боротокуолтан ааҕан көрдөххө, көбүөргэ тоҕус ыйааһыҥҥа барыта 88 эдэр бөҕөс тахсан күөн көрүстэ.

Ыйааһыннарынан кыттыылаахтары аахтахха, 38 кг – 12, 41 кг – 12, 44 кг – 8, 48 кг – 10, 52 кг – 12, 57 кг – 9, 62 кг – 9, 68 кг – 10, 75 кг – 8 кыттааччы баара.

Саха сирэ «Азия оҕолорун» бэлэмнээн уонна тэрийэн ыытарын быһыытынан, икки састаабы туруорара көҥүллэммитэ. Онуоха көҥүл тустууга бастакы хамаандабыт толору эбит буоллаҕына, иккис састаапка биэс уол киирэн кытынна.

Күрэхтэһии 38 киилэттэн саҕаланна. Манна Константин Кондрашов (СФО) диэн нуучча уола бэрт сытыытык, сэниэлээхтик тустан, эрэллээхтик бастаата. Кини финалга утарсааччытын – азербайджанец Рзазадены киирээт өттүктээн түһэрэн, түргэн үлүгэрдик ыраас кыайыыны ситистэ. Бу киирсии – финалларга саамай түргэнник быһаарыллыбыт киирсии буолла. Дьиктитэ диэн баар, наҕараадалааьын кэмигэр билбиппит, Кондрашов тус тренерэ – кэрэ аҥаар эбит.

Биһиги уолаттарбытыттан бу ыйааһыҥҥа Егор Ефимов финал чиэппэригэр Рзазадеҕа хотторон кэбиспитэ, онтон киһитэ финалга тахсыбытын быһыытынан, «уоскутар» бөлөххө бэйэтин киһитэ Н.Платоновы кыайан баран, боруонса мэтээл иһин киирсиигэ кыргыз Рысбековка сабырыйтарда.

Иккис ыйааһыҥҥа Дьулустаан Капитонов – бастаабыт Тулкуновка (Узбекистан) уонна «уоскутар» бөлөххө Рахатовка (Казахстан) хотторуулааҕынан ааҕылынна.

44 киилэҕэ Власий Афанасьев – Г.Джиджоевы (ДФО), М.Валиевы (УФО), онтон Ариан Винокуров – Кубанычбековы (Кыргызстан), К.Нуруллаевы (Узбекистан) кыайталаан, финалга таҕыстылар. Маныаха, быһаарыылаах хапсыһыыга сирэй көрсүүлэригэр Саха сирин 1 №-дээх хамаандатын чилиэнэ Винокуров утарсааччытын албаска киллэрэн, кылбар кыайыыны ситистэ. Кинилэр тустууларын уонна атын финаллары «Дьулурҕан» ютуб каналыгар көрүөххүтүн сөп.

Онон бу ыйааһыҥҥа уолаттарбыт күннээтилэр, иккиэн – кыһыл уонна үрүҥ көмүс мэтээллэр хаһаайыннарынан буоллулар. Кыайыылаах Ариан Винокуров – тренердэрэ Н.Яковлевы, В.Кривошапкины, М.Шергини эҕэрдэлиибит! Иккистээбит Власий Афанасьев, Мэҥэҕэ тренер Иван Белолюбскай салалтатынан дьарыктанар.

48 кг ыйааһыҥҥа уон кыттааччыттан – үһэ саха тустууга кыһатын иитиллээччитэ. Кинилэртэн, Дальнай Восток хамаандатыттан кыттыбыт Чурапчы тустууга кыһатыгар эрчиллэр Никифор Семенов табыллан тустан, түһүлгэлээҕин көрдөрдө. Финалга Семенов узбек бөҕөһүн «промакашка» диэн албаска киллэрэн, ыраас кыайыыны ситистэ. Итинэн кини кыһыл көмүс мэтээлинэн наҕараадаланна. Тренерэ – олимпиец Виталий Корякин.

Ол оннугар Андрей Слепцовпут табыллыбата, бастакы киирсиитигэр кыргыз Нурмаматовка хотторон, күрэхтэһииттэн туораата. Онтон иккис хамаандаттан кыттыбыт Айтал Аммосов – бастаан Алижоновка (Узбекистан) хоттордо. «Уоскутар» бөлөххө беларус Н.Исмаилы хотон баран, оонньуу боруонса мэтээлин иһин киирсиигэ Нурмаматовка 3:6 ахсаанынан сабырыйтаран кэбистэ.

52 киилэҕэ тустубут уолаттарбыт Айсен Захаров, Леонид Павлов бастакы киирсиилэригэр хоттордулар. Онтон Дальнай Восток аатыттан кыттыахтаах Ньургун Чемезов кореец Кимы кытта тустуохтаах этэ. Ону, аккредитацията табыллыбата диэн киллэрбэтилэр. Онон бу ыйааһыҥҥа мэлийдибит.

Манна Хотугу Корея (КНДР) соҕотох кыттааччыта Ким Кванг күннээтэ. Үс утарсааччытын киһилээбэтэ, эрэллээхтик кыайталаата.

57 кг Саян Федоров (тренердэрэ К.Сивцев, К.Павлов, В.Копырин) – Москва уонна Казахстан уолаттарын үчүгэйдик кыайталаан баран, финалга таджик Бахромовка утарса сатаата даҕаны, кыаҕа тиийбэтэ. Онон иккис миэстэни ылла. Бу да үчүгэй көрдөрүү.

Бу ыйааһыҥҥа бастакы хамаандаттан кыттыбыт Арылхан Кононов биир эрэ эргиир тустан хаалла.

Салгыы, 62 киилэҕэ Эрхан Николаевпыт эмиэ табыллыбата. Тувин Ондарга уонна «уоскутар» бөлөххө кыргыз Байжигитовка хотторон туораата.

68 киилэҕэ Пантелеймон Софронеев үчүгэй өйдөбүлү үөскэттэ. Финал чиэппэригэр узбек Азизуллаевка эрэ сабырыйтарда. Салгыы күрэхтэһиигэ пакистанец А.Хассаны уонна үһүс миэстэ иһин тустууга кыргыз Закиржановы (5:3) кыайталаан, моонньугар боруонса мэтээли кэтэр кыахтанна. Кини тренерэ – А.Харлампьев.

Бу ыйааһыҥҥа Дальнай Восток хамаандатыттан Арчын Готовцев таджик Набиевка хотторон туораата, киһитэ түмүккэ үһүс буолла.

Уонна оҕолорго саамай улахан ыйааһыҥҥа (75 кг) биһигиттэн Андрей Николаев кытынна. Кини Кыргызстан бөҕөһүгэр хоттордо.

Уолаттарбыт тустууларын кылгастык билиһиннэрдэххэ итинник. Онон Кузьма Сивцев сүрүн тренердээх Саха сирин эдэр бөҕөстөрө түмүккэ 2 кыһыл көмүс, 2 үрүҥ көмүс уонна 1 боруонса мэтээллэри ылары ситистилэр. Кыайыылаах уонна миэстэлэспит уолаттарга, кинилэр тренердэригэр эҕэрдэ! Уолаттарбытыгар уонна атын да ситиһиилээхтик кыттыбыт эдэр спортсменнарга “Азия оҕолоро”, кинилэр улахан спорка тахсалларыгар үктэл буоларыгар баҕарабыт уонна кинилэри сыныйан кэтээн көрүөхпүт.

Петр ПАВЛОВ.

Ааптар видеоҕа уһулуута, хаартыскаҕа түһэриитэ.