Андрей Яковлев: «Хапсаҕайга кими да өрө көрдөрүө суохтаах этибит»

«Азия оҕолоро» норуоттар икки ардыларынааҕы VIII спортивнай оонньуу биир көрүҥүнэн хапсаҕай буолла. Күрэхтэһии «Өрөгөй» Спорка бэлэмнэнии киинигэр биир көбүөрүнэн ыытылынна. Түһүлгэҕэ 11 хамаандаттан 45 эдэр бөҕөс тахсан күөн көрүстэ. Күрэхтэһии сүрүн судьуйатынан көҥүл тустууга ССРС, хапсаҕайга Саха Республикатын спордун маастара Андрей Яковлев үлэлээтэ.

Хапсыһыылар бүппүттэрин кэннэ тута Андрей Вячеславовичтан кылгастык санаатын ыйыталастым.

-Оонньуу бэйэбит сирбитигэр ыытыллыбыта ордук интэриэһинэй буолла. Хамаандалар үчүгэйдик оҥостон, бэлэмнэнэн кэлбиттэр. Хапсаҕайга 9 дойду бөҕөстөрө кытыннылар. Балаһыанньа быһыытынан хамаандаттан биирдии киһи кыттар. Онон кыттааччы аҕыйах диир сыыһа буолуо. Иран, Индия курдук тустууга күүстээх дойдулар ситэтэ суох састаабынан кытыннылар. Онон, тэҥнээн көрдөххө, хапсаҕай күрэхтэһиитэ ааспыт оонньуутааҕар састаабынан күүстээх буолла дии саныыбын. Холобур, Узбекистантан, Таджикистантан бу оонньууларга көҥүл тустууга миэстэлэспит уолаттара күүстэрин холостулар. Этэргэ дылы, кыайыы үөрүүтүн амтаһыйан, өйдөрүнэн-санааларынан, эттэринэн-хааннарынан билбит бөҕөстөр.

Онтон биһиэннэрэ аҥардас хапсаҕайга эрэ кыттарга диэн сыалланан-соруктанан кытыннылар. Бэйэлэрин кыахтарынан кииристилэр диэн сыаналыыбын. Уонна биири этиэхпин баҕарабын, бу оонньууларга дьиҥэ 2008 с. төрөөбүттэр киириэхтээх этилэр. Ону оонньуу салалтата былырыын, «Азия оҕолоро» саҕаланыа биир сыл иннинэ, 2009 сыллаахтар киирэллэр диэн уларытан кэбиспитэ. Билэргит курдук, оонньуу түөрт сылга биирдэ ыытыллар. Биһиги онно оҥостон эрдэттэн сыаллаан-соруктаан бэлэмнэммиппит. Онон былырыыҥҥыга диэри тренердэр атын, күүстээх састаабы бэлэмнии сылдьыбыттара. Онон суһал үлүгэрдик саҥа састаабы талыы буолбута. Ол кыратык таайда быһыылаах. Ол эрэн, биэс ыйааһынтан – икки кыһыл көмүс диэн, Россия иһинээҕи биир региоҥҥа, мин санаабар сөп курдук.

Владивостокка буолбут оонньууга хапсаҕайга 6 дойду кыттыбыта. Кыттааччы эмиэ 40-чэ этэ да, маннааҕар арыый сымнаҕас соҕус састааптаах этэ диэхпин баҕарабын. Онно биһиги алта ыйааһынтан – биэс уолбут бастаабыта. Онон Саха сирин хамаандата мэтээлин ахсаанынан 12-с испитин, хапсаҕайдьыттар 7-с миэстэҕэ таһаарбыттара. Быйылгы хапсаҕай састааба куустээх. Атыттартан азербайджаннар, монголлар, регионнартан сибиирдэр үчүгэйдик кииристилэр. Үөһээ Бүлүү уола Кэскил Федоров утарсааччытын наһаа үчүгэйдик подсечкалаан түһэрэн, киһитэ охторун кэтэһэн туран хаалла. Утарсааччыта охтон иһэн сүһүөҕүн булан, туран кэлэн утары атахтаан кэбистэ. Уолбут ону өйдөөбөккө да хаалла. Итинник, сыыһа-халты туттуулар бааллар. Аны билигин хас биирдии кыайыыны-хотторууну үчүгэйдик сыныйан үөрэтии, ырытыы үлэтэ барыахтаах. Кэлэр сылларга хатыламматын инниттэн.

Хапсаҕай – биһиги, сахалар төрүт көрүҥмүт. Онон дьиҥэ манна кими да өрө көрдөрүө суохтаах этибит дии саныыбын. Бэйэм тустарым саҕана, биир да киһи миигин кыайыа суохтаах диэн суоттанан киирсэрим…

PS: Күрэхтэһии түмүк көрдөрүүтүн dzulurgan.ru сайтка, быһаарыылаах хапсыһыылары манна https://www.youtube.com/c/Dzulurgan көрүөххүтүн сөп.

Петр ПАВЛОВ.