Сонуннар

Үөр-көт Саха сирэ! Лев Павлов – Европа чемпиона!

Туймаада туонатыгар «Азия оҕолоро» норуоттар икки ардыларынааҕы VIII спортивнай оонньуу ситиһиилээхтик түмүктэммитин уруйдаан, ыраах Сербия сириттэн биир дойдулаахпыт Лев Павлов чиҥэтэн биэрдэ.

Эрдэ иһитиннэрбиппит курдук, Нови Сад куоракка көҥүл тустууга эдэрдэргэ (21-гэр диэри саастаахтарга) Европа күрэхтэһиитэ ыытылла турар. Онуоха бастакы финалларга биһиги эрэлбит Лев Павлов (57 кг) азербайджанец Васиф Багировы, уолаттарга Европа уонна аан дойду түһүлгэтин кыайыылааҕын тыҥааһыннаах хапсыһыыга 8:6 ахсаанынан хотто. Онон уолбут Европа чемпиона буолан, пьедестал үрдүкү үктэлигэр таҕыста.

Санатан эттэххэ, бу күрэхтэһиигэ Лев – итальянеһы 10:0, грузины 8:7, армянины 4:1 ахсааннарынан кыайталаабыта.

57 киилэҕэ түмүк: 1. Лев Павлов (Россия), 2. Васиф Багиров (Азербайджан), 3. Расул Галбураев (Франция), Айк Гаспарян (Армения).  

Түгэнинэн туһанан, эдэр талааннаах тустуукпут, Россия эдэрдэргэ күрэхтэһиитин кыайыылааҕа, улахан дьоҥҥо чемпионатын үрүҥ көмүс призера Лев Павлов уочараттаах ситиһиитинэн кини тренердэрин Николай Даниловы, Герман Контоевы уонна Сербияҕа тиийэн күүс-көмө, өйөбүл буолбут “Өрөгөй” Спорка бэлэмнэнии киинин дириэктэрэ Михаил Пахомовы, Россия спортивнай тустууга федерациятын эппиэттээх үлэһитэ Петр Юмшановы, бүтүн Саха сирин тустууну таптааччыларын эҕэрдэлиибит! Ситиһииттэн уоскуйбакка, салгыы дьаныардаахтык дьарыктанан, улахан кыайыыларга эрэллээхтик хардыылаан иһэригэр баҕарабыт.

Бу түһүлгэҕэ өссө иккис киһибит – Россия эдэрдэргэ күрэхтэһиитин кыайыылааҕа Андрей Мидловец (61 кг) барыллааһын киирсиилэргэ дьоһун кыайыылары ситиһэн, финалга тустар кыахтанна. Утарсааччыта – азербайджанец Джамал Аббасов, былырыын 17-гэр диэри саастаахтарга Европа кыайыылааҕа, аан дойду призера. Уолбутугар ситиһиилээх тустууну баҕарабыт! Финаллар бүгүн түүн 01:00 саҕаланаллар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

196902
Бүгүн : 275