Суруналыыстар ыһыахтарыгар кимнээх кыайдылар?

Саха төрүт бэчээтин күнүн көрсө Саха сирин Суруналыыстарын сойууһун 65 сылыгар аналлаах үбүлүөйдээх ыһыах үрдүк тэрээһиннээхтик ыытылан түмүктэннэ.

Билигин, төрөөбүт дойдубут – Сахабыт сирин айылҕата хаһааҥҥытааҕар даҕаны ситэн-хотон, сайыҥҥылыы көҕөрөн, силигилээн турар – алгыс ылар тоҕоостоох кэмэ. Маннык үтүө күҥҥэ-дьылга ханан даҕаны, айылҕалыын алтыһан ыһыахтар ыһыллаллар.

Сурук-бичик уонна сонуну киэҥник тарҕатар тэрилтэлэр үлэһиттэрэ сылын ахсын маннык тэрээһини тэрийэллэр. Быйыл даҕаны Үс Хатыҥҥа ыытыллыбыт Ыһыах силигин ситтэ. Алгыс сиэрэ-туома, саха төрүт аһыгар, сахалыы таҥаска, оһуохайга көрүүлэр, бастыҥы талыылар буоллулар.

// Халадаайдаах сүүрүү түгэнэ

Ыһыах сиэрин ситэрэн, илии-атах оонньууларын ыытыы – бу күн биир тыҥааһыннаах, ыһыылаах-хаһыылаах тэрээһининэн буолла. Ол курдук, дьахталларга уонна эр дьоҥҥо сүүрүү, хапсаҕай, канат тардыһыыта хаһан баҕарар буоларыныы сүрдээх хатыһыылаахтык ыытылынна.

Халадаайдаах сүүрүүгэ Вероника Жиркова (“Кэскил-Юность Севера” хаһыаттан) бастаата, Юлия Пестрякова (“СахаБэчээт”) иккис, Женя Давыдова (Саха НКИХ) үһүс буоллулар. Онтон уолаттарга үс бириистээх миэстэни Ариан Григорьев (СахаБэчээт), Айхал Матвеев (“Ил Түмэн” хаһыат), Андрей Дягилев (“Кэскил-Юность Севера”) ыллылар. Хапсаҕайга Ариан Григорьев кыайталаата, иккис – Айхал Матвеев, үһүс – Айаал Христофоров (СахаБэчээт). Кыайыылаахтар мэтээллэринэн, анал бириистэринэн, дипломнарынан наҕараадаланнылар.

Көрбүккүт курдук, бу тэриллибит күрэхтэһиилэргэ «СахаБэчээт» тэрилтэ үлэһитэ, биллиилээх мадьыны Ариан Григорьев үчүгэй көрдөрүүнү ситистэ. Кини сүүрүүгэ уонна хапсаҕайга бастаата, канат тардыһыытыгар хамаанданан иккис буолла.

// Кыргыттарга уонна уолаттарга сүүрүү бастыҥнара

Канат тардыһыытыгар алта хамаанда кыттыбытыгар, бастакы миэстэни “СахаБэчээт” иккис хамаандата ылла. Иккис миэстэҕэ “СахаБэчээт” бастакы хамаандата таҕыста. Үһүс бириистээх миэстэҕэ “Саха” национальнай көрдөрөр-иһитиннэрэр хампаанньатын хамаандата тигистэ.

Күрэхтэһиилэри “Спорт Якутии” сайт салайааччыта Александр Посельскай үүннээн-тэһииннээн ыытта.

Ити курдук, суруналыыстар уонна бэчээт эйгэтин үлэһиттэрин ыһыаҕа – кыайыылаахтары, сымсалары, быһыйдары быһаарда. Сонуну-нуомаһы тарҕатар, иһитиннэрэр-көрдөрөр эйгэ үлэһиттэрэ тустаах үлэлэрин таһынан чөл олоҕу тутуһалларын, спордунан дьарыктаналларын, үлэ коллективтарын күрэхтэһиилэригэр өрүү ситиһиилээхтик кытталларын, бэйэлэрэ күүстээх, биллэр спортсменнардаахтарын бу да сырыыга көрдөрдүлэр.

Петр Павлов.

// Хапсаҕай бастыҥнара, ортоку кыайыылаах – Ариан Григорьев 

// Канат тардыһыытыгар тэҥнээхтэрин булбатах “СахаБэчээт” тэрилтэтин хамаандалара.

Ааптар хаартыскаҕа түһэриитэ.