Сонуннар

Спорт маастара Владимир Степанов кэриэһигэр

Оҕо көмүскэлин Аан дойдутааҕы күнүгэр “Эрчим” спорткомплекска ССРС спордун маастара Владимир Николаевич Степанов кэриэһигэр көҥүл тустууга Бүлүү куорат аһаҕас күрэхтэһиитэ буолан ааста. Түһүлгэҕэ Дьокуускай, Ньурба, Үөһээ Бүлүү, Горнай уонна Бүлүү эдэр бөҕөстөрө күөн көрүстүлэр. Көбүөргэ барыта 166 бөҕөс таҕыста.

Күрэхтэһии үөрүүлээх аһыллыытыгар Бүлүү куорат баһылыга Ян Анатольевич Попов оҕо сылдьан тренер В.Н. Степанов салалтатынан хайдах тустуунан дьарыктаммытын кэпсээтэ уонна эдэр бөҕөстөргө ситиһиилэри баҕарда. Ити курдук, В.Г. Румянцев аатынан Бүлүүтээҕи оҕо спортивнай оскуолатын дириэктэрин солбуйааччы Александр Маисов, Бүлүү куорат спорка управлениетын начаалынньыга Степан Федоров, күрэхтэһии сүрүн судьуйата Артем Харлампьев, В.Н. Степанов аймаҕа Прасковья Андреевна эҕэрдэлээтилэр.

Күрэхтэһии кыайыылаахтарынан буоллулар, 2014-2016 сс. төрөөбүттэргэ: 22 кг – Данил Протопопов, 24 кг – Диамид Крылов (иккиэн Чинэкэ), 28 кг – Саян Красков (Бүлүү), 32 кг – Евгений Алексеев (Хорула, Ньурба), 35 кг – Арылхан Иванов (Бүлүү), 35-тэн үөһэ кг – Эрхаан Васильев (Ньурба).

2011-2013 сс төрөөбүттэргэ: 28 кг – Данияр Десяткин (СДЮСШ-3), 30 кг – Николай Коновалов (Хампа), 35 кг – Борис Никифоров, 38 кг – Мирон Протопопов (иккиэн Бүлүү), 45 кг – Вадим Петров (СДЮСШ-3), 45-тэн үөһэ кг – Платон Саввинов (Үөһээ Бүлүү).

2008-2010 сс. төрөөбүттэргэ: 35 кг – Ян Львов, 38 кг – Яков Николаев (иккиэн Бүлүү), 42 кг – Эрхаан Николаев (Хорула, Ньурба), 47 кг – Миша Сергеев (Бүлүү), 52 кг – Григорий Яковлев (Үөһээ Бүлүү), 57 кг – Айсен Постников (Горнай), 62 кг – Миша Семенов (Бүлүү), 70 кг – Денис Потапов (Үөһээ Бүлүү).

Степанов Владимир Николаевич 1956 с. Бүлүү куоратыгар төрөөбүтэ, көҥүл тустууга ССРС спордун маастара, Саха сирин 1978 с. 45 киилэ ыйааhыҥҥа бастакы чемпиона, тустуунан Д.П. Коркин салалтатынан дьарыктаммыта. Новосибирскай куоракка физкультурнай техникуму бүтэрбитэ. Новосибирскай к. «Зенит», «Буревестник», «Авангард» спортивнай обществолар чемпионнара. Бүлүүгэ Ыччат, туризм, физкультура уонна спорт управлениетын специалиhынан, В.Г. Румянцев аатынан оҕо, ыччат спортивнай оскуолатын ыстаарсай тренеринэн үлэлээбитэ. Эдэр сааhыгар оhолго түбэhэн олохтон эрдэ туораабыта. Бүлүү к. В.Н. Степанов кэриэhигэр турнир үгэс быһыытынан ыытыллар.

Бүлүү куорат спорка управлениета.  

Добавить комментарий

Ваш адрес email не будет опубликован. Обязательные поля помечены *

186564
Бүгүн : 268