Сонуннар

Соһуччу үөрүү!

Биллиилээх судаарыстыбаннай уонна уопсастыбаннай диэйэтэл, Саха сиригэр физическэй култуура уонна успуорт хамсааһынын тэрийээччи, ССРС физическэй култуураҕа туйгуна Николай Николаевич Тарскай төрөөбүтэ 100 сылыгар аналлаах өрөспүүбүлүкэтээҕи ыһыах үөрүүлээх аһыллыытыгар бастыҥнары наҕараадалаатылар.

Ол курдук, наҕараадаламмыттар ортолоругар – ХИФУ иһинэн устудьуоннар успуортарын киинин салайааччыта, Бүтүн Арассыыйатааҕы устудьуоннар успуорка сойуустарын Саха сиринээҕи сэбиэтин бэрэссэдээтэлэ Александр Викторович Черкашин илиититтэн “Арассыйа спорка министиэристибэтин 100 сылынан” анал түөскэ анньыллар бэлиэнэн уонна туоһу дастабырыанньанан наҕараадаланным.

Бу наҕараада – успуорду сырдатыыга үлэм сыаната дии саныыбын. Итиэннэ биир дойдулаахтарым, дьонум-сэргэм ортотугар, бары ытыктыыр, сүгүрүйэр киһибит Николай Николаевич Тарскай үбүлүөйдээх тэрээһинигэр сөп түбэһиннэриллэн туттарыллыбытыттан олус долгуйан туран ис сүрэхпиттэн астынабын.

Манна даҕатан эттэххэ, ыһыах чэрчитинэн “Николай Тарскай” диэн, үбүлүөйгэ анаан таһаарбыт саҥа кинигэбит сүрэхтэниитин улуустааҕы библиотека ситимэ (салайааччы Иван Копырин) тэрийэн ыыппытыгар махтанабыт.

Александр Викторовичка истиҥ махтал! Үлэҕэр, олоххор ситиһиилэри баҕарабын!

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *

186564
Бүгүн : 268