«Сайын!» бэстибээл саахымакка күрэхтэһиитигэр

Оҕо көмүскэлин күнүгэр «Арассыыйа – мин устуоруйам» пааркаҕа оҕолорго уонна ыччаттарга аналлаах «Сайын!» өрөспүүбүлүкэтээҕи иккис бэстибээл түмүктэннэ.

Бу улахан таһымнаах тэрээһини Саха Өрөспүүбүлүкэтин «Инники көлүөнэ сайдыытыгар» сыаллаах пуондата уонна талааннаах оҕолору өйүүр өрөспүүбүлүкэтээҕи киинэ үүннээн-тэһииннээн салайан ыыттылар.

Бэстибээлгэ – наукаҕа, успуорка, креативка уонна искусствоҕа анаан быыстапкалар тэрилиннилэр. Холобур, пуонда саахымакка күрэхтэһиитэ көхтөөхтүк ыытылынна. Күрэхтэһии сүрүн судьуйатынан, Саха сирин оҕолорго хамаандатын тириэньэрэ Роман Ганжуров буолла.

Түмүккэ Дьокуускай куорат 31 №-дээх оскуолатын хамаандата бастаата. Иккис миэстэни 39 №-дээх оскуола эдэр саахыматчыттара ыллылар. Үһүс бириистээх миэстэҕэ Дьокуускайдааҕы физико-техническэй лиссиэй хамаандата таҕыста.

Кыайыылаахтар – «Инники көлүөнэ сайдыытыгар» сыаллаах пуонда салайааччыта Владимир Егоров илиититтэн тустаах дипломнарынан, мэтээллэринэн, өйдөбүнньүк бэлэхтэри тутаннар, үөрүүлэрэ-көтүүлэрэ үксээтэ.

Петр ПАВЛОВ.

Ааптар хаартыскаҕа түһэриитэ.