Сонуннар

Саҥа кинигэ сүрэхтэннэ

Бэс ыйын 10 күнүгэр Дьокуускай куоракка, Национальнай библиотека кыраайы үөрэтээччилэргэ саалыгар, Аан дойдуга аатырбыт Чурапчытааҕы спортивнай интэринээт-оскуола иитиллээччилэрэ 55 сааспытыгар ананар, диэн “Ректайм” типографияҕа бэчээттэммит буруолуу сылдьар электроннай варианнаах, куар-кодтаах, видеолар сыһыарыылаах саҥа кинигэ сүрэхтэннэ.

​Кинигэ ааптара – Ньурба улууһун Малдьаҕарыттан төрүттээх, Маалыкай орто оскуолатын выпускнига, Чурапчытааҕы интэринээт оскуола иитиллээччитэ, “Марха өрүс көмүскээччилэрэ” общественнай айылҕа харыстабылын регионнааҕы түмсүүтүн бэрэссэдээтэлэ, Саха Өрөспүүбүлүкэтин адвокатскай палататын чилиэнэ, адвокат Любомир Николаевич Михайлов – Уххаан.

Бу дьоро күммүт Чурапчытааҕы интэринээт оскуола ахтыы кинигэ сүрэхтэниитигэр, кинигэҕэ тула, истиҥ-иһирэх кэпсэтиилэринэн саҕаланна.

Эҕэрдэ тылы ыҥырыллыбыт күндү ыалдьыттар: биһиги иитээччибит СӨ үөрэҕириитин туйгуна Мария Семеновна Оконешникова, СӨ үтүөлээх суруналыыһа, Сунтаар улууһун бочуоттаах олохтооҕо, 110 кинигэ, альбом ааптардара Владислав Петрович Коротов, СӨ үтүөлээх суруналыыһа, араадьыйа уонна бэчээт туйгуна, Чурапчытааҕы интэринээт-оскуола выпускнига Татьяна Афанасьевна Гоголева, СӨ наукатын уонна үрдүк үөрэхтээһинин бочуоттаах үлэһитэ, СӨ үөрэхтээһинин туйгуна, физико-математическай наука кандидата, Чурапчытааҕы интэринээт-оскуола выпускнига, Д.П. Коркин үөрэнээччитэ, Дьокуускай куорат тустууга федерациятын солбуйааччы бэрэссэдээтэлэ, тустуу туһунан элбэх кинигэлэр ааптардара, суруналыыс, общественник Дмитрий Афанасьевич Егоров, СӨ үөрэҕириитин туйгуна, көҥүл тустууга ССРС маастарга кандидата Сергей Афанасьевич Николаев, куоракка олорор үөлээннээхтэрим, үөлээннээхтэрим оҕолоро эттилэр, алгыстарын тиэртилэр, иитээччибит Мария Семеновна сэмэй бэлэх туттарда, үөлээннээхтэрим Махтал сурук туттардылар.

Дьоро күммүтүн сахалыы ырыанан Чурапчы Мырылатыттан төрүттээх, биллиилээх норуот ырыаһыта Лена Ильина – Намчы уонна Булуҥ улууһун Намыытыттан төрүттээх үөлээннээхпит, СӨ тыатын хаһаайыстыбатын туйгуна, Чурапчы интэринээт-оскуолатын 1986 сыллаах выпускнига, доҕорбут Семен Попов улахан уола, эдэр кэскиллээх ырыаһыт Илларион Садовников – Хоглинька ыллаан киэргэттилэр.

Кинигэ күн сирин көрөрүгэр ахтыы суруйан хайдах интэринээккэ үөрэммиппитин ахтан-санаан аастыбыт, мустубут ыалдьыттар, үөлээннээхтэрим бэйэлэрин көрүүлэрин, баҕа санааларын эттилэр.

Тэрээһиҥҥэ кэлбит үөлээннээхтэрбит, үөлээннээхтэрбит оҕолоро, күндү ыалдьыттар бары саҥа кинигэ бэлэх тутан сүргэлэрэ көтөҕүллэн дьоллоннулар, 3 кинигэбитин Национальнай библиотекаҕа кэнчээри ыччаттарга бэлэхтээтим, убаастабыллаах иитээччибитигэр Мария Семеновнаҕа, күндү ыалдьыппытыгар Татьяна Афанасьевнаҕа, норуот таптыыр ырыаһытыгар Лена Ильинаҕа – Намчыга, үөлээннээхпитигэр Тамара Ивановаҕа тыыннаах сибэкки дьөрбөтүн үөлээннээхтэр уонна бэйэм ааппыттан үөрүүлээх быһыыга-майгыга туттардыбыт.

Бу кинигэ күн сирин көрөрүгэр истиҥ ахтыыларын суруйбут, кинигэбит сүрэхтэнэригэр көмөлөспүт үөлээннээхтэрбэр, кылааһынньыктарбар, оҕо сааһым доҕотторугар Вася Новгородовка, Коля Кожуровка, Юра Дурановка, Семен Поповка, Афоня Ыракыевка, Коля Коркиҥҥа, Миша Сивцевка, Лаврентий Абрамовка, Лина Шараборинаҕа, Тома Ивановаҕа, Наташа Адамоваҕа, Наташа Монастыреваҕа, Владилена Абрамоваҕа, иитээччибитигэр Мария Семеновна Оконешниковаҕа, учууталбытыгар Татьяна Дмитриевна Новгородоваҕа барҕа махталбын тиэрдэбин уонна чэгиэн-чэбдик туругу, этэҥҥэ буолууну баҕарабын.

“Чурапчытааҕы интэринээт-оскуола иитиллээччилэрэ 55 сааспытыгар ананар” саҥа кинигэ спорду сэҥээрээччилэргэ, чөл олоҕу өрө тутааччыларга, бар дьоммутугар күндү бэлэх буоллун!

Убаастабылы уонна махталы кытары кинигэ ааптара Любомир Николаевич МИХАЙЛОВ – Уххаан.

Бэс ыйын 11 күнэ. Дьокуускай куорат.

 

Добавить комментарий

Ваш адрес email не будет опубликован. Обязательные поля помечены *

196892
Бүгүн : 265