Сөҕүмэр ситиһии

Бэс ыйын 15-16 күннэригэр пауэрлифтиҥҥэ эр дьоҥҥо республика чемпионата буолан түмүктэннэ. Бу, Саха сирин бухатыырдарын ортотугар соҕотох 66 саастаах бэтэрээн, норуокка ааттаммытынан “Хаҥалас Хахайа” Антон Адамов кыттыыны ылан, эдэрдэри кытта эр-биир эрийсэн, иккис миэстэни ылла.

Итинэн кини көрөөччүлэри уонна кыттааччылары сэргэхситтэ да, соһутта да.

Сааһырбыт бэтэрээн мадьыны 230 кг олорон турда, 120 кг өрө аста, 240 кг өрө тарта. Бу иннинэ ыам ыйын 21 күнүгэр Екетеринбург куоракка Россия Ийэ Хотун чемпионатыгар 251 кг штанганы өрө тардан, “бытыктаах” рекорду тупсаран – дойду дьонун соһуппута, үөрдүбүтэ.

Киһи сөҕөрө диэн, Антон Адамов бу ситиһиилэрэ сүрэҕэр аһан киирэн ыарахан эппирээсийэ, иккитэ куртахха хаан бырыытын тохтотуу, ковид курдук олоххо кутталлаах ыарыылар кэннилэриттэн, инбэлиит тугунан да кэмнэммэт ситиһиилэммитэ буолар.

“Хаҥалас Хахайа” диэн сүдү ааты норуот мээнэҕэ иҥэрбэтэҕин, олоххо тардыһыытын, спорка дьулуурун, модьу санаалааҕын, кыах баарын Сахатын сирин мааны дьонугар, Үрүҥ Тунах ыһыахтар үгэннээн саҕаламмыт кэмигэр көрдөрбүтүгэр үөрүүбүн, сөҕүүбүн үллэстэбин.

Александр Скрыбыкин.