Сонуннар

Николай Тарскайга аналлаах пьеса биһирэннэ

Бэс ыйын 8 күнүгэр Баатаҕай нэһилиэгэр (Уус Алдан) бөдөҥ судаарыстыбаннай уонна общественнай диэйэтэл, Саха сиригэр физкултуурунай хамсааһыны тэрийээччи, ССРС физическэй култуураҕа туйгуна Николай Николаевич Тарскай төрөөбүтэ 100 сылыгар анаан өрөспүүбүлүкэтээҕи ыһыах ыытылынна.

Бэлиэ күҥҥэ элбэх култуурунай уонна спортивнай дьаһаллар, атыы-тутуу, быыстапка, бюст аһыллыыта, саҥа бэчээттэнэн тахсыбыт кинигэ сүрэхтэниитэ, о.д.а. кэрэхсэбиллээх тэрээһиннэр буоллулар. Үбүлүөйдээх ыһыахха элбэх бочуоттаах ыалдьыттар, күүстээх спортсменнар, биллиилээх артыыстар кыттыыны ыллылар.

Ыһыах кэмигэр Н.Н. Тарскай кэрэ бэлиэ түгэнигэр анаан ССРС уонна РФ Суруналыыстарын сойууһун чилиэнэ, СӨ суруйааччыларын союһун чилиэнэ, СӨ култуураҕа үтүөлээх үлэһитэ, СӨ Бэчээтин туйгуна, СӨ суруналыыстарын эйгэтигэр В.В. Никифоров – Күлүмнүүр аатынан судаарыстыбаннай бириэмийэ лауреата, “Гражданскай килбиэн” бэлиэ хаһаайына, элбэх ырыалар, гимнэр ааптардара Иннокентий Ильич Сыроватскай “Төлкөлөөх түөрэх” диэн, дьиҥнээх чахчыларга уонна личностарга олоҕурбут сэттэ көстүүлээх пьесата быһа тардыллан көрдөрдөрүлүннэ.

Пьеса Бороҕон нэһилиэгин олохтоохторун күүһүнэн туруорулунна. Кинилэр сыанаҕа быһа тардан көрдөрүүлэрэ – Николай Николаевич Тарскайга аналлаах ыһыаҕы киэргэттэ, силигин ситэрэн биэрдэ диэххэ сөп.

Манна даҕатан эттэххэ, ыһыаҕы үөрүүлээхтик аһыыга Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Сергей Васильевич Местников мустубут дьону эҕэрдэлээн туран, Н.Н. Тарскай аата АЛРОСА тэрилтэ саҥа булуллубут алмааһыгар иҥэриллибитин туһунан үөрүүлээх сонуну иһитиннэрдэ. Иккис үөрүүлээх сонунунан, И.И. Сыроватскай суруйбут Н.Н. Тарскайга аналлаах пьесатын күһүн өрөспүүбүлүкэ киин куоратын театрыгар көрдөрүллэрин туһунан этиитэ буолла.

Ити курдук, саха спордун аҕатынан билиниллибит Николай Николаевич Тарскай сырдык үтүө аата салгыы үйэтитиллэр.

Петр ПАВЛОВ.

Ааптар хаартыскаҕа түһэриитэ уонна видеоҕа уһулуута.  

 

Добавить комментарий

Ваш адрес email не будет опубликован. Обязательные поля помечены *

186585
Бүгүн : 289