Николай Тарскай – спорду тэрийиигэ уһулуччулаах салайааччы

Бэс ыйын 8 күнүгэр Баатаҕай нэһилиэгэр (Уус Алдан) бөдөҥ государственнай уонна общественнай деятель, Саха сиригэр физкультурнай хамсааһыны тэрийээччи, ССРС физическэй култуураҕа туйгуна Николай Николаевич Тарскай төрөөбүтэ 100 сылыгар анаан өрөспүүбүлүкэтээҕи ыһыах ыытыллар.

Бэлиэ күҥҥэ элбэх култуурунай уонна спортивнай тэрээһиннэр, атыы-тутуу, быыстапка, бюст аһыллыыта, саҥа бэчээттэнэн тахсыбыт кинигэ сүрэхтэниитэ, о.д.а. буолуохтара. Үбүлүөйдээх ыһыахха элбэх бочуоттаах ыалдьыттар, күүстээх спортсменнар, биллиилээх артыыстар кыттыыны ылыахтара.

Биир бочуоттаах ыалдьытынан – архыыбы хасыһар, элбэх киһи билбэтин билэн дьоҥҥо-сэргэҕэ киэҥник тарҕатар спорт бэтэрээнэ, республикатааҕы волейбол федерациятын толорооччу дириэктэрэ Яков Семенович Сивцев буолар. Кини Н.Н. Тарскай өтө көрүүтүн, чаҕылхай үлэтин маннык сыаналыыр:

–Николай Николаевич спорду тэрийээччи быһыытынан кырдьык, атыттартан уһулуччулаах, ураты көрүүлээх салайааччы. Спорт биһиэхэ, республикаҕа ааспыт үйэ сүүрбэһис сылларыттан сайдан барбыта. Онно соҕурууттан кэлбит специалистар, бэйэбит да дьоммут күүстээхтик үлэлээбиттэрэ. Бүтүн Саха сиринээҕи спартакиадалар ыытыллан испиттэрэ. Ол гынан баран, Николай Николаевич спорду тэрийиигэ уһулуччу үлэтин сыаналааһыҥҥа, мин санаабар, бастакытынан, физкултуура уонна спорт көрүҥнэрин борустуой гимнастикаттан саҕалаан улахан спорка тиийэ сүрдээҕин үөрэппит уонна бэйэтэ онон дьарыктаммыт, онно ситиһиилэммит эбит. Ол курдук, кини гимнастика, сүүрүү, волейбол, хайыһар, футбол көрүҥнэрин итиэннэ билэргит курдук тустууну, боксаны, ыарахан атлетиканы барытын дириҥник билэр буолан, далааһыннаахтык, киэҥник үлэлээбит.

Кини биир сүҥкэн саҥаны киллэриитэ – республика иһигэр ыытыллар күрэхтэһиилэр сайдыыларын ситимин олохтообута буолар. Ол курдук, колхозтар күрэхтэһиилэрин тэрийбит. Онно республикаттан анал үбүлээһин көрүллэрин ситиспит. Билиҥҥи курдук, улуус бэйэҥ дьаһанаҕын диэн буолбатах. Онон барытын ситимнээн, колхозтар спартакиадаларыттан саҕалаан – оройуон, республика спартакиадалара ыытыллалларын ситиспит. Ол түмүгүнэн эһиилигэр РСФСР спартакиадатыгар кыттар хамаанда эрдэттэн талыллан, сүүмэрдэнэн кыттыбыттар. Барыта итинник ситимнээх үлэттэн саҕаламмыт.

Ол иһин ити спорка үлэлээччилэргэ да, тэрийээччилэргэ даҕаны сүрдээх табыгастаах уонна чыпчаалга тахсарга, бэйэлэригэр сыал-сорук туруоралларыгар улахан оруолу ылбыт дии саныыбын. Онтон Н.Н. Тарскай спорка итинник ситимнээх, былааннаах үлэни киллэрэн, физкултуура уонна спорт киэҥ далааһыны ылан, олохтоохтор ону ылынан уонна салалта билинэн, улахан өйөбүлү ылбыт эбит.

Петр ПАВЛОВ.