Мас-рестлиҥҥэ икки кыһыл көмүстэннибит

Бүгүҥҥүттэн, Манчаары аатынан спорт төрүт көрүҥнэригэр республикатааҕы “Модун” спорка комплексыгар “Азия оҕолоро” норуоттар икки ардыларынааҕы VIII спортивнай оонньуу мас-рестлиҥҥэ күрэхтэһиитэ саҕаланна.

Бастаан уолаттарга 50 уонна 60 кг ыйааһыннаахтар ким күүстээҕин быһаарыстылар.

Күрэхтэһиини үөрүүлээхтик аһыыга Саха Республикатын Правительствотын председателин солбуйааччы Сергей Местников, СР физическэй култуураҕа уонна спорка министрэ Леонид Спиридонов, мас-рестлинг аан дойдутааҕы федерациятын президенэ Александр Акимов, мас-рестлинг Россиятааҕы федерациятын салайааччыта Михаил Гуляев, спорт национальнай уонна Олимпиадаҕа киирбэт көрүҥнэригэр Россиятааҕы тэрилтэ вице-президенэ Игорь Павлюк кыттыыны ыллылар. Кинилэр, “Азия оҕолоро” оонньуу саҕаламмытынан эҕэрдэлээтилэр, ким күүстээх, үчүгэй бэлэмнээх – ол кыайарыгар баҕардылар.

Бэлиэ түгэнинэн, Саха Республикатын физическэй култуураҕа уонна спорка министиэристибэтэ спорт национальнай уонна Олимпиадаҕа киирбэт көрүҥнэригэр Россиятааҕы тэрилтэни кытта бииргэ үлэлэһиигэ сөбүлэҥнэрин түһэрсиилэрэ буолла.

Дьэ, ол кэнниттэн быһаарыылаах тардыһыылар саҕаланнылар. Онно көрдөххө, атын да омуктар саха бу төрүт көрүҥэр дьоҕурдаахтарын итэҕэттилэр. Кыргызтар мас тардыһыынан дьарыктанан, балайда ситиһиилэммиттэрэ биллэр. Аны индустар ылсан эрэллэр эбит. Ол да буоллар, төрүт көрүҥмүтүгэр уолаттарбыт түһэн биэрбэтилэр. Тимир Луковцев (50 кг) уонна Александр Захаров (60 кг) быһаарыылаах киирсиилэргэ утарсааччыларын 2:0 ахсаанынан эрэллээхтик кыайан, сааланы толору мустубут көрөөччүлэри, элбэх ахсааннаах ыалдьааччыларын үөртүлэр.

Онон, эдэр мадьыныларбыт Саха сирин хамаандатыгар бастакы кыһыл көмүс мэтээллэри аҕаллылар. Түгэнинэн туһанан кинилэри уонна тренердэри эҕэрдэлиибит! Итиэннэ сахалыы сиэринэн сэмэйдик салгыы ситиһиилэри кэтэһэбит.

Мас-рестлинг бастакы күнүн түмүгэ:

50 кг: 1. Тимир Луковцев (Саха сирэ-1), 2. Юграм (Индия), 3. Негруй Дагвадорж (Монголия), Мухаммад Советов (Кыргызстан).

60 кг: 1. Александр Захаров (Саха сирэ-1), 2. Александр Фролов (Сибиирдээҕи федеральнай уокурук), 3. Халим каналбеков (Кыргызстан), Мухаммад Шахир (Пакистан).

Спорт бу көрүҥэр күрэхтэһии салҕанан барар. Биһиги сайтпытын кэтээн көрө сылдьаргытыгар баҕарабыт.

Петр ПАВЛОВ.

Ааптар хаартыскаҕа түһэриитэ уонна видеоҕа уһулуута.