Хатастар “Азия оҕолорун” тэрээһиннэригэр

«Азия оҕолоро» оонньуу ыытыллыытын чэрчитинэн буолар тэрээһиннэргэ хатастар көхтөөхтүк кытта сылдьаллар.

Чөл-чэгиэн олох туоһута, сайдыы-үүнүү аартыга, дойдунан киэн туттуу киэҥ киэлитэ, дойдуга тапталы иитии үтүөкэн өрүтэ, сайдыылаахтары кытта тэҥҥэ хаамсыы, атыттары кытта алтыһыы, туспалары кытта туруулаһыы – бу барыта 8-с төгүлүн ыытыллар «Азия оҕолоро» күөн күрэһэ буолар.

Бэс ыйын 26 күнүгэр Сахабыт сиригэр умнуллубат түгэннэр буолан аастылар – «Азия оҕолорун» уота Бүтүн Сахабыт сирин кэрийэн кэлэн, Дьокуускай устун айаннаата. Айан түмүгэ «Доҕордоһуу» болуоссатыгар буолла. Бу күн Хатас нэһилиэгэ бэрт тэрээһиннээхтик уонна көхтөөхтүк кытынна.

Ол курдук, уоту Ил Дархаҥ илиититтэн биһиги киэн туттар оҕобут, Арассыыйа спордун маастара, РФ дзюдоҕа сүүмэрдэммит хамаандатын чилиэнэ, дойдулар икки ардыларынааҕы күрэхтэр кыайыылаахтара Аина Моисеева ылла, ону тэҥэ атын түһүмэххэ «Саҥа ааттар» күрэхтэһии чемпиона, 2022 сылга Дьокуускай куорат бастыҥ спортсмена, мас тардыһыытыгар Арассыыйаҕа бастыыр иһин күрэхтэһии призера, Манчаары оонньууларын чемпиона Иван Степанов кытынна.

«Доҕордоһуу» болуоссатыгар уоту көрсөргө ырыа айааччы, СӨ үөрэхтээһинин туйгуна, СӨ култууратын туйгуна Николай Андросов мелодиятыгар, Мария Андреева, Сергей Прачев тылларыгар СӨ култууратын үтүөлээх артыыската Сахаайа, СӨ култууратын туйгуна Кирилл Матвеев уонна «Тускул» КК (дириэктэр Чепалов В.А.) дьарыктанар, Самсоновтар ааттарынан Хатас орто оскуолатын (дириэктэр Слепцов Н.В.) «Көмүс дорҕоон» СӨ образцовай вокальнай устуудьуйатын иитиллээччилэрин (салайааччы СӨ култууратын туйгуна Татьяна Окорокова) толорууларыгар «Мы – дети Азии» диэн ырыа сүрэхтэниитэ буолан, бар дьон дьүүлүгэр таҕыста. Айымньы биир саамай долгутуулаах түгэнинэн Михаил Ефимович Николаев эт куолаһа иһиллибитэ буолла.

Маны таһынан спорт араас көрүҥэр СӨ сүүмэрдэммит хамаандаларыгар Хатаспыт оҕолоро киирбиттэрэ, кинилэр тустарынан сыыйа билиһиннэрэн иһиэхпит.

Наталья РУФОВА.

Хатас.