Сонуннар

Дуобатчыт оҕобут сэдэх ситиһиитэ

Мэҥэ Хаҥалас улууһун Мэлдьэхси орто оскуолатын үөрэнээччитэ 16 саастаах Прокопий Говоров Москва уобалаһыгар эр дьоҥҥо Саха сириттэн соҕотоҕун, 100 харахтаах дуобакка Арассыыйа түһүлгэтиттэн соторутааҕыта күрэхтэһэн кэллэ.

Маҥнай классическай программаҕа дойду 18 бастыҥ дуобатчыттара кытыннылар. Манна 5 гроссмейстер, 6 маастар уоннааҕылар эдэр кэскиллээх маастарга кандидаттар бааллар. Ыытыллыбыт 7 туур түмүгүнэн Проня үһүс миэстэҕэ тахсары ситистэ. Бастакы, иккис миэстэлэри уопуттаах гроссмейстердар, аан дойду хас да төгүллээх чөмпүйүөнэ Александр Георгиев (Башкортостан), биллиилээх дуобатчыт Александр Гетманский (Тула уобалаһа) ыллылар. Маннык сүдү түмүктэри сахалартан урут гроссмейстердар Николай Гуляев, Николай Гермогенов, маастар Вячеслав Варламов ситиһэн тураллар. 2014 с. Николай Гермогенов, 2018 с. Николай Гуляев бастаабыттара.

Аны, түргэн дуобакка (быстрая программа) 30 киһи, ол иһигэр 9 гроссмейстер, 11 маастар, 10 маастарга кандидат 9 тууру оонньоотулар. Түмүккэ, Прокопий Говоров Александр Георгиев кэнниттэн иккис миэстэ буолла. Үһүскэ Александр Гетманский таҕыста. Уолбут 8 туур түмүгүнэн бастаан испит. Бүтэһик оонньууга кини тэҥнэһэн, Георгиев кыайан инники чорбойор. Онон дуобатчыт эдэр уолбут улахан дьоҥҥо Арассыыйа ааттаахтарын ортотугар киирэн эрэр диэн сэмэйдик сахалыы уруйдуу-айхаллыы көрсөбүт.

Тус тренерэ Василий Куприянов этиитин истэбит: “Проняны кыра кылаастан саҕалаан эрчийэн кэллим. Оҕо эрдэҕиттэн оонньуур баҕалааҕа, кытаанах характердааҕа, кыайыыга ураты дьулуурдааҕа, таһыччы дьоҕурдааҕа биллэр этэ. Кыайыылара-хотуулара өрөспүүбүлүкэнэн, Арассыыйанан, Европанан, аан дойдунан үгүс. Быйыл 20 саастарыгар диэри эдэрдэргэ Арассыйаҕа бастаабыта түбэспиччэ буолбатах эбит. Бу, биһиэхэ мэҥэлэргэ, улахан дьон ортотугар историяҕа киирэр хаһан да ылыллыбатах кирбии буолар. Узбекистантан саҥа кэлэммин сайыҥҥы дуобат лааҕырын аһаары Проняны кытары барсыбатаҕым. Уол сотору кэминэн Бурятияҕа барыахтаах, ол кэннэ Монголияҕа норуоттар икки ардыларынааҕы турнирга кыттар. Проняҕа ситиһиилэр салгыы кэлэллэригэр эрэнэбин”.

Степан Андреев. Майа с.

Добавить комментарий

Ваш адрес email не будет опубликован. Обязательные поля помечены *

196901
Бүгүн : 274