Баатаҕайга Николай Николаевич Тарскай бюһа аһылынна

Бэс ыйын 8 күнүгэр Уус Алдан улууһун Баатаҕай нэһилиэгэр бөдөҥ судаарыстыбаннай уонна общественнай диэйэтэл, Саха сиригэр физкультурнай хамсааһыны тэрийээччи, ССРС физическэй култуураҕа туйгуна Николай Николаевич Тарскай төрөөбүтэ 100 сылыгар аналлаах өрөспүүбүлүкэтээҕи «Саргыбыт салалынна, өрөгөйбүт үрдээтэ» ыһыах сарсыарда олохтоох оскуола иннигэр, Н.Н. Тарскай бюһун үөрүүлээхтик аһыыттан саҕаланна.

Бу күн Николай Николаевич Тарскай аатын ааттаан, кинини ытыктыыр, киниэхэ сүгүрүйэр дьон кэрэ бэлиэ тэрээһиҥҥэ анаан ыраахтар-чугастан тоҕуорустулар. Күммүт да сайыҥҥылыы чаҕылыйан, үлэлээҥ-хамсаан, үөрүҥ-көтүҥ диэбиттии туран биэрдэ.

Бюст аһыллыытыгар Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Сергей Васильевич Местников, Уус Алдан улууһун дьаһалтатын баһылыга Василий Иванович Аммосов, Ил Түмэн депутата Геннадий Анатольевич Васильев, СР физическэй култуураҕа уонна спорка министрин солбуйааччы Гаврил Михайлович Мохначевскай, Баатаҕай нэһилиэгин баһылыга Михаил Михайлович Белолюбскай, Саха сирин уонна Арассыыйа физическэй култуураҕа үтүөлээх үлэһитэ, Д.П. Коркин аатынан Судаарыстыбаннай бириэмийэ лауреата Афанасий Егорович Алексеев, “Кэнчээри” оҕо народнай ансамбылын салайааччы Василий Степанович Парников бэйэлэрин эҕэрдэлэрин эттилэр.

Бюһу Геннадий Оллонов оҥорбут. Мустубут дьон бары уонна Н.Н. Тарскайы кытта алтыһан илэ көрбүт Афанасий Егорович Алексеев бигэргэтиилэринэн – үлэ табыллыбыт, Николай Николаевич сэбэрэтигэр үкчү маарынныыр диэн сыаналаатылар, ааптар Геннадий Николаевичка махтаннылар.

Тыл этиилэрин быыһыгар Н.Н. Тарскай аатын сүгэр Баатаҕай орто оскуолатын үөрэнээччилэрэ биллиилээх биир дойдулаахтарын туһунан дьүһүйүүлэрэ, көлүөнэлэр силбэһиилэрин курдук көстүбүтэ кэрэхсэбиллээх. Ол аата, Николай Николаевич саҕалаабыт дьыалата, үлэтэ-хамнаһа аныгы кэмҥэ ыччаттарынан, оҕолорунан салҕанан бара турар диэн эрэл баарын туоһута.

Петр ПАВЛОВ.

Ааптар хаартыскаҕа түһэриитэ.