«Азия оҕолоро-2024» култуурунай программата  

«Азия оҕолоро» норуоттар икки ардыларынааҕы VIII спортивнай оонньуулар кэмнэригэр республикабыт киин куоратыгар киэҥ хабааннаах култуурунай тэрээһиннэр ыытыллаллара былааннанар.

Ол курдук, өссө бэс ыйын 1 күнүттэн «Арассыыйа – мин устуоруйам» пааркаҕа «Азия оҕолоругар» сыһыаннаах быыстапка аһыллыбыта уонна алтынньыга диэри үлэлиэҕэ.

Национальнай художественнай музейга Санкт-Петербургдааҕы судаарыстыбаннай музейтан Айвазовскай хартыыналарын быыстапкатын көрүөххүтүн сөп. Ити курдук, оонньуулар кэмнэригэр Дьокуускай куорат музейдарын ааннара көрөөччүлэргэ аһаҕас буолуохтара.

Орджоникидзе болуоссатыгар кинигэ норуоттар икки ардыларынааҕы дьаарбаҥката тэриллиэҕэ.

«Дьокуускай ыалдьыттары көрсөр» диэн бырааһынньыктааҕы кэнсиэр, Доҕордоһуу болуоссатыгар СР судаарыстыбаннай филармониятын кэнсиэрэ, Култуура уонна сынньалаҥ пааркатыгар оҕолорго аналлаах тэрээһиннэр, кэнсиэрдэр күннэтэ тэриллиэхтэрэ.

Бэс ыйын 27 күнүттэн саҕалаан хас күн ахсын, киэһэ 19:00-21:00, Комсомоллар болуоссаттарыгар “Азия оҕолоро” оонньуу кыайыылаахтарын үөрүүлээхтик наҕараадалааһын сиэрэ-туома буолуоҕа.

Бэс ыйын 28-30 күннэригэр Марфа уонна Сергей Расторгуевтар ааттарынан Судаарыстыбаннай циркаҕа «Мамонтёнок-2024» норуоттар икки ардыларынааҕы 7-с бэстибээл ыытыллыаҕа.

Ити курдук, бэс ыйын 24 күнүттэн – от ыйын 6 күнүгэр диэри куорат олохтоохторугар, ыалдьыттарыгар уонна оҕолорго аналлаах араас таһымнаах тэрээһиннэр быыстала суох ыытыллыахтара. Биллэн турар, “Азия оҕолорун” култуура чааһыгар муҥутуур түгэнинэн – оонньуулары үөрүүлээхтик аһыы буолуоҕа.

Култуурунай тэрээһиннэри Саха Республикатын култуураҕа уонна духуобунай сайдыыга, СР үөрэххэ уонна наукаҕа министиэристибэлэрэ, Марфа уонна Сергей Расторгуевтар ааттарынан судаарыстыбаннай циркэ, «Азия оҕолоро» оонньуу дириэксийэтэ, о.д.а. култуураҕа сыһыаннаах тэрилтэлэр үүннээн-тэһииннээн ыыталлар.

PS: “Азия оҕолоро” норуоттар икки ардыларынааҕы VIII спортивнай оонньуу күрэхтэһиилэрин программатын dzulurgan.ru сайтка көрүөххүтүн сөп.

«Дьулурҕан».