Өйдөбүнньүк илии баттааһын

«Мин Арассыыйам» устуоруйа пааркатыгар «Азия оҕолоро» норуоттар икки ардыларынааҕы спортивнай оонньууларын быыстапката үөрүүлээхтик аһылынна.

Бэлиэ түгэҥҥэ ыалдьыттартан анаан өйдөбүнньүк илии баттааһын дуоскатын оҥорбуттарыгар бастакынан өрөспүүбүлүкэтээҕи успуорт түмэлин салайааччыта Михаил Друзьянов, Арассыыйа норуодунай артыыһа Андрей Борисов, СӨ духуобунай сайдыыга уонна култуураҕа министрэ Афанасий Ноев, СӨ норуотун хаһаайыстыбатын үтүөлээх үлэһитэ Матвей Мучин, СӨ физическэй култуураҕа уонна успуорка министрин бастакы солбуйааччы Александр Бугаев уонна «Азия оҕолоругар» кыттар волейболист уолаттар бэйэлэрин автографтарын суруйан хааллардылар.

Тэрийээччилэр эппиттэринэн, быыстапка көрөөччүлэрэ баҕа өртүлэринэн бу анал дуоскаҕа бэйэлэрин илии баттааһыннарын хаалларыахтарын сөп эбит. Кэлин бу эмиэ, үйэлээх өйдөбүнньүк быһыытынан ууруллан, дьоҥҥо-сэргэҕэ көрдөрүллэн, «Азия оҕолоро» оонньууну өрүү саната туруоҕа.

Петр ПАВЛОВ.

Ааптар хаартыскаҕа түһэриитэ.