Яков Павлов боруонса иһин тустуоҕа

Россия көҥүл тустууга чемпионатын бастакы күнүн түмүгүнэн икки ыйааһыҥҥа мэтээл иһин кимнээх тусталлара сүрүннээн билиннэ. Саха тустууга кыһатын иитиллээччитэ Яков Павлов үһүс бириистээх миэстэ иһин тустуоҕа.

Эрдэ иһитиннэрбиппит курдук, бэҕэһээ эр дьоҥҥо 61 уонна 92 кг ыйааһыннаахтар күрэхтэһиини саҕалаабыттара. Онуоха 61 киилэҕэ сэттэ бөҕөспүт кыттыбытыттан, Яков Павлов үчүгэй тустууну көрдөрдө. Онтон 92 киилэҕэ үс уолбут кыттыбытыттан – Ньургун Сергиҥҥэ кыра тиийбэтэ. Кини үс утарсааччытын кыайан баран, финал чиэппэригэр хотторон кэбистэ.

Финалга тахсар иһин киирсиигэ Яков Павлов — Башир Магомедовка (Дагестан) 0:2 ахсаанынан хотторон кэбистэ. Ол кэмҥэ Заур Угуев — Тамерлан Караевы (Ставропольскай кыраай) 3:0 кыайда.

Онон 61 кг финалга Башир Магомедов уонна Заур Угуев (иккиэн Дагестан) көрсөр буоллулар. Яков Павлов утарсааччыта – “уоскутар” бөлөххө тустуу түмүгүнэн биллиэҕэ. Ол аата, биһиги В.Яковлевпыт, осетин И.Кочиев, москвич А.Калибатов, М.Себединов (Брянскай) тустууларын бастыҥнарын кытта киирсэрэ күүтүллэр.

Онтон 92 кг кыһыл көмүс мэтээл иһин тустуохтара: Асхаб Саадуллаев (Дагестан) — Алан Багаев (ХМАО).

Бэҕэһээ саҕалаабыттартан өссө 61 киилэҕэ финалга тахсыбыт Башир Магомедовка хотторбут Виктор Яковлевпыт бүгүн «уоскутар» бөлөххө тустар буолла. Кини осетин Ибрагим Кочиевы кыттыа киирсиэҕэ.

Бүгүн чемпионаты 70 уонна 79 кг ыйааһыннаахтар саҕалыыллар. Онуоха биһиги 70 киилэҕэ Аввакумов Албан, Бояновскай Владимир, Фомин Олег, Капрынов Константин, Потапов Айсен ситиһиилээх тустууларын эрэнэ кэтэһэбит.

Чемпионат хаамыытын күннэтэ сырдатан иһиэхпит. “Дьулурҕан” сайтын, ютуб каналын, Телеграмҥа страницатын кэтээн көрө сылдьаргытыгар.

Бүгүн, ыам ыйын 1 күнүгэр чемпионат хапсыһыылара Дьокуускай бириэмэтинэн 17:00 чаастан саҕаланаллар. Хаһан баҕарар буоларыныы, уолаттарбытыгар ыалдьабыт. Ситиһиилээх тустууну баҕарабыт!

Петр ПАВЛОВ.