Виктор Яковлев боруонса иһин тустуо

Көҥүл тустууга Россия чемпионатын иккис күнэ бэҕэһээҥҥи ыйааһыннарга «уоскутар» бөлөх тустууларынан уонна эр дьоҥҥо 70, 79 кг ыйааһыннаахтар киирсиилэринэн саҕаланна.

Күн бу кэрчигэр ордук Виктор Яковлев сэргэхситтэ. Кини бэҕэһээ 61 киилэҕэ бастакы эргииргэ Башир Магомедовка хотторбута. Салгыы күрэхтэһиигэ дагестанец финалга тахсыбытын быһыытынан, балаһыанньаҕа олоҕуран киниэхэ хотторбуттар туспа бөлөххө киирэн, ким үһүс бириистээх миэстэ иһин киирсэрин быһаарсаллар.

Онуоха Эдьигээн ыччата Виктор Яковлев бастаан осетин Ибрагим Кочиевы 12:1, онтон дагестанец Абдул Калибатовы 7:1 уонна Магомед Себединовы (Брянскай) 2:1 ахсааннарынан кыайталаата. Ити хапсыһыылар бэрт кылгас кэм иһигэр ыытылыннылар. Ол эрэн, биһиги эдэр бөҕөспүт киирсииттэн киирсии аайы дьоһун тустууну көрдөрөн, элбэх албаһы оҥорон, кимээһиннээтик тустубутун бэлиэтиир оруннаах. Ордук миэлиҥсэни, накаты о.д.а. албастары тутунна. Манна даҕатан эттэххэ, Виктор – Саха сирин үтүөлээх тренерэ Николай Николаевич Рожин салалтатынан дьарыктанар.

Итинэн кини бүгүн «аччыгый финал» диэн ааттанар 61 кг боруонса мэтээл иһин киирсиигэ – Оренбург чиэһин көмүскүүр бэйэбит киһибит Яков Павловы кытта тустар буолла. Хайата да кыайбытын иһин, саха тустуутун оскуолата билиҥҥитэ биир боруонса мэтээллэннэ диэххэ сөп.

Эр дьоҥҥо бүгүн чемпионаты икки ыйааһын саҕалаабыт эбит буоллаҕына, биһигиттэн 79 киилэҕэ ким да суох. Онтон 70 кг ыйааһыҥҥа биэс уолбут кытынна. Кинилэртэн Айсен Потапов уонна Олег Фомин финал чиэппэригэр тиийэн, туһааннааҕынан Иналбек Шериевкэ (КБР) уонна Курбан Шираевка (Дагестан) хотторон кэбистилэр. Сэрэйдэххэ, бу бөҕөстөр финалга тахсар буолуохтаахтар. Онон биһиги уолаттарбыт билигин да мэтээл иһин киирсэр кыахтарын сүтэрэ иликтэр диэххэ сөп.

Программа быһыытынан бу түүн 00:00 чааска 70, 79 кг ыйааһыннаахтар финалга тахсар иһин тустуулара саҕаланыа. Онтон 01:00 чаастан – 61, 92 кг финаллара буолуо. Хаһан баҕарар буоларыныы, уолаттарбытыгар ыалдьабыт. Ситиһиилээх тустууну баҕарабыт!

Чемпионат хаамыытын күннэтэ сырдатан иһиэхпит. “Дьулурҕан” сайтын, ютуб каналын, Телеграмҥа страницатын кэтээн көрө сылдьаргытыгар.

Петр ПАВЛОВ.    

Хаартыска, Дагестан тустууга сайтыттан ылыллан туһанылынна.