Виктор Рассадин уонна Айаал Лазарев – олимпиецтар!

Дьэ, Турция Стамбул куоратыгар ыытылла турар көҥүл тустууга Олимпиадаҕа бүтэһик сүүмэрдиир аан дойдутааҕы турнир биһиэхэ, сахаларга үтүө түмүктээх буолла.

Күрэхтэһии бастакы күнүн түмүгүнэн, Виктор Рассадин уонна Айаал Лазарев олус ситиһиилээхтик тустан, аны сайын Парижка ыытыллар XXXIII сайыҥҥы Олимпийскай оонньууларга кыттар кыахтаннылар.

Сиһилии соҕустук билиһиннэрдэххэ, күрэхтэһиини түөрт бөҕөспүт саҕалаабыта. Быйылгыттан Таджикистан чиэһин көмүскүүр Виктор Рассадин (74 кг) сэрэбиэйэ күүстээх этэ. Кини утуу-субуу аан дойду чемпионатын призера, Азия икки төгүллээх чемпиона Нуркожа Кайпановы (Казахстан), аан дойду чемпионатын призера Зелимхан Хаджиевы (Франция), Вадим Цурканы (Украина) уонна быһаарыылаах хапсыһыыга быйылгыттан Албанияттан кыттар Россия-2023 чемпиона, осетин Чермен Валиевы кыайталаата.

Манна биир, киһи хараҕар тута сатаан быраҕыллыбатах түгэни, Виктор Рассадин – Чермен Валиевы кытта тустуутугар, тренерэ Артур Константинов тута бэлиэтии көрөн, челлендж быраҕан, судьуйалар быһааралларыгар туруорсубута, саамай тоҕоостоох буолла дии саныыбын. Мониторга эргитэн көрбүттэрэ, Валиев кырдьык, ыксаан биһиги бөҕөспүт трикотуттан тардыбыт. Онтон быраабыла быһыытынан, утарсааччыҥ трикотуттан тартахха, биир баалы сүүйтэрэҕин. Ити курдук, спорка туох барыта кыл саҕаттан тутулуктаах. Артур Константинович тренер быһыытынан улахан таһымнааҕын ити да түгэн көрдөрөр.

Ыарахан ыйааһыҥҥа тумус туттар тустуукпут Айаал Лазарев (125 кг) бастакы эргииргэ сынньанан баран, салгыы күрэхтэһиигэ Джонсоны (Ямайка), Хасанбой Рахимовы (Узбекистан) уонна финалга тахсыыга аан дойду уонна Европа чемпионаттарын призера Даниель Лигетины (Венгрия) эрэллээхтик кыайталаата. Итинэн кини үһүс Олимпиадатыгар кыттар буолла. Бу, бэйэтэ дьоһун ситиһии.

Бөҕөстөрбүт финалга тахсыбыттарын быһыытынан, күрэхтэһии балаһыанньатыгар олоҕуран, олимпийскай лицензиялары ыллылар. Бастакы миэстэ иһин хапсыһыы ыытыллыбата. Рассадиннаах Лазарев чахчы да сиппит-хоппут хапсыһыылары көрдөрөн, биир дойдулаахтарын сүрдээҕин үөртүлэр.

Онтон Владимир Егоров (57 кг) уонна Ньургун Скрябин (65 кг) бүгүн “уоскутар” бөлөххө киирэн тустуохтара. Ол курдук, американец Спенсер Лигы хотторбут бөҕөстөр, ол иһигэр биһиги Владимир Егоровпыт үөһэ бөлөххө тустуохтара. Бастаан Тарик (Марокко) – Зоу (Кытай) көрсөллөр. Кинилэр кыайыылаахтарын кытта Владимир Егоров тустуоҕа. Онно ким кыайбыт казах Калжаны кытта, ким бу бөлөххө бастыҥын быһаарсыаҕа. Анараа бөлөххө болгарин Вангелов, украинец Яценко, Чон Сонг Хан (КНДР) киирсиэхтэрэ. Манна хайалара кыайбыт үөһээ бөлөх уоскутар бөлөҕүн бастыҥын кытта олимпийскай путевканы былдьаһыаҕа.

Ньургун Скрябин “уоскутар” бөлөххө Аскаровы (Казахстан) кытта көрсөр. Манна ким кыайбыт Ким Хван Джины (КНДР) кытта тустуо. Салгыы өссө Арушанян (Украина) баар…

Дьэ, бүгүн тустар уолаттарбытыгар ситиһиини баҕарабыт!

Онон, Саха сирин тустуутугар дьоро күн буолла. Виктор Рассадин (тренерэ Артур Константинов) уонна Айаал Лазарев (тренерэ Иван Сивцев) Олимпиадаҕа кыттар буолбуттарынан тустууктарбытын бэйэлэрин, кинилэр тренердэрин, бу ситиһиигэ сыһыаннаах бары салайааччылары, тустууну таптааччылары, бүттүүн Саха сирин эҕэрдэлиибит!

Манан, аны сайын ыытыллар Парижтааҕы XXXIII сайыҥҥы оонньууларга билиҥҥи туругунан Саха сириттэн – Георгий Окороков, Арыйаан Тютрин, Виктор Рассадин, Айаал Лазарев кыттар буоллулар.

Манна даҕатан эттэххэ, бөҕөстөрбүт, Саха сиригэр тустууну төрүттээбит Николай Николаевич Тарскай төрөөбүтэ 100 сыллаах өрөгөйдөөх үбүлүөйүгэр сүдү бэлэҕи оҥордулар диэххэ сөп.

PS: Уолаттарбыт тустууларын уонна атын сыыппаралары-чахчылары, хаартыскалары “Дьулурҕан” хаһыат телеграмҥа страницатыгар t.me/dzulurgan киирэн көрүөххүтүн сөп. Барыгытыгар ситиһиини, олох салҕанар!

Бүгүн күрэхтэһии Дьокуускай бириэмэтинэн киэһэ 21:00 чаастан саҕаланар. Бастаан “уоскутар” бөлөх тустуулара, онтон салгыы олимпийскай лицензия иһин киирсиилэр буолуохтара. Дьэ, хаалбыт алта кэтэһиилээх күндү путевканы кимнээх ылыахтарай?

Петр ПАВЛОВ.