Уолаттарбытыгар эрэнэбит!

Москва уобалаһын Одинцово куоратыгар Олимпиада иннинээҕи Россия спортивнай тустууга чемпионата үгэннээн ыытылла турар. Манна дьахталлар уонна эр дьон көҥүл тустууга күрэхтэһиилэригэр, тэрийээччилэр этэллэринэн, 500-чэкэ спортсмен күөн көрсөр.

Бүгүн чемпионат үһүс күнэ. Программа быһыытынан, бастаан эр дьон 70 уонна 79 кг ыйааһыннарга «уоскутар» бөлөххө тустуулара буолуоҕа. Онно 70 киилэҕэ биһигиттэн икки уолбут кыттыаҕа.

Санатан эттэххэ, бэҕэһээ Айсен Потапов уонна Олег Фомин иккилии утарсааччыларын кыайан баран, финал чиэппэригэр туһааннааҕынан кабардинец Иналбек Шериевка уонна дагестанец Курбан Шираевка хоттортоон кэбиспиттэрэ. Дьонноро финалга тахсыбыттарынан, Потапов уонна Фомин салгыы тустар кыахтаннылар.

70 киилэҕэ үөһэ бөлөхтөн бастаан М.Ахмадулаев (Брянскай) – С.Казырык (Тыва) пааратын кыайыылааҕын кытта Айсен Потапов киирсиэ. Манна ким кыайбыт «аччыгый финалга», ол аата, чемпионат боруонса мэтээлин иһин М.Эльтемировы (Чечня) кытта күөн көрсүөҕэ.

Онтон аллараа бөлөххө А.Сат (Тыва) – Т.Хатуев (Чечня) кыайыылааҕа, Олег Фомиҥҥа тахсыаҕа. Хайалара кыайбыт үһүс бириистээх миэстэни У.Умаровтыын (Дагестан) былдьаһыаҕа.

Уолаттарбытыгар эрэнэбит. Ылан көрдөххө, баһыйыахтарын сөптөөх. Сөптөөх диэн буолуо дуо, хайаан да кыайыахтарын наада. Ирдэбил оннук турар. Ханныгын да иһин, мин санаабар, Айсен Потапов уонна Олег Фомин кинилэрдээҕэр тустар таһымнара, инники көрдөрүүлэрэ ордук. Барыта бэйэлэриттэн тутулуктаах. Чэ, көбүөр көрдөрүө…

Ону тэҥэ бүгүн дьахталлар тустууларыгар Надежда Галдина (65 кг) уонна Лилиана Рожина (72 кг) күрэхтэһиини саҕалыыллар.

Чемпионат хаамыытын күннэтэ “Дьулурҕан” сайтыгар, ютуб каналыгар, Телеграмҥа страницатыгар сырдатан иһэбит. Биһигини кэтээн көрө сылдьыҥ.

Бүгүн, ыам 2 күнүгэр чемпионат хапсыһыылара Дьокуускай бириэмэтинэн 17:00 чаастан саҕаланаллар. Онтон финаллар түүн 01:00 чаастан буолуохтара. Хаһан баҕарар буоларыныы, уолаттарбытыгар ыалдьабыт. Ситиһиилээх тустууну баҕарабыт!

Петр ПАВЛОВ.