Студеннар тустууларын көрүөхпүт

Ыам ыйын 17-19 күннэригэр биһиги Дьокуускайбытыгар, чопчулаан эттэххэ, «Кыайыы 50 сыла» Спорт дыбарыаһыгар Саха сирин бастакы президенэ, республика көҥүл тустууга федерациятын президенинэн үлэлии сылдьыбыт Михаил Ефимович Николаев кэриэһигэр спортивнай тустууга Россия студеннарга чемпионата ыытыллар.

Чемпионат тустуу үс көрүҥэр: көҥүлгэ, дьахталларга уонна гректии-римнии тустууга ыытыллар.

Биллэрин курдук, үс кэнники сылларга саха студент тустууктара Россия күрэхтэһиитигэр ситиһиилээхтик кытталлар. Бу да сырыыга, көҥүл тустууга кыайыыны ситиһэргэ дьулуһаллар.

Тэрийээччилэр иһитиннэрбиттэринэн, чемпионакка дойду 20-чэ регионуттан 300-чэкэ спортсмен кэлэрэ күүтүллэр. Күүстээхтэринэн Дагестан, Бурятия, Тыва, Красноярскай, Москва хамаандалара буолуохтара. Саха сирин чиэһин – ХИФУ, АГАТУ уонна Чурапчы институтун бөҕөстөрө көмүскүөхтэрэ.

Бу чемпионат түмүгүнэн, аны күһүн Кытайга ыытыллар студеннар аан дойдутааҕы күрэхтэһиилэригэр кыттар Россия хамаандатын састааба сүүмэрдэниэ.

М.К. Аммосов аатынан Хотугулуу Илиҥҥи федеральнай университет хамаандатыттан Уйгулаан Иванов, Петр уонна Алексей Копыловтар, Александр Авелов, Станислав Свинобоев, Никита Софронов, Никита Хабаров уо.д.а. биллэр бөҕөстөр кытталлар. Онтон Чурапчытааҕы физическэй култуура уонна спорт институтуттан Любомир Ашеин, Артем Слепцов, Константин Капрынов уо.д.а. тустуохтара.

Тустууну таптааччылары бука барыгытын күрэхтэһиигэ ыҥырабыт! Кэлэн сытыы хапсыһыылары көрүҥ, биир дойдулаахтаргытыгар ыалдьыҥ. Киириитэ – босхо.

«Дьулурҕан».