Сотору – үөрэнээччилэр спартакиадалара

Бэс ыйын 6-10 күннэригэр Дьокуускайга уонна Горнай улууһун киинигэр Бэрдьигэстээххэ, Саха Өрөспүүбүлүкэтин үөрэнээччилэрин сайыҥҥы иккис спартакиадаларын бүтэһик быһаарыылаах күрэхтэһиитэ ыытыллыаҕа.

Санатан эттэххэ, бу спартакиада эрдэ былааннаммытынан Намҥа ыытыллыахтаах этэ. Ону сааскы халаан алдьатыытыттан, атын сиргэ көһөрүлүннэ.

Бүгүн өрөспүүбүлүкэтээҕи Медиа кииҥҥэ буолбут пресс-конференцияҕа Саха Өрөспүүбүлүкэтин үөрэххэ уонна наукаҕа министрин бастакы солбуйааччы Алевтина Аргунова, өрөспүүбүлүкэтээҕи оҕо успуордун «Спортивные якутяне» тэрилтэ дириэктэрин солбуйааччы Александр Брызгалов, спартакиада сүрүн судьуйата Юрий Балаганскай кыттыыны ылан, күрэхтэһии тэрээһинин туһунан билиһиннэрдилэр.

Кинилэр, үөрэнээччилэр спартакиадалара 1994 сылтан саҕаламмытын, 2023 сылтан Ил Дархан Айсен Николаев дьаһалынан сөргүтүллүбүтүн санаттылар. Итиэннэ Намтан көһөрүллэн, өрөспүүбүлүкэ киин куоратын спорка тутууларыгар, Горнай улууһугар ыытыллар буолбутугар, махталларын биллэрдилэр. Улахан таһымнаах күрэхтэһии үһүс быһаарыылаах түһүмэҕэр спорт 9 көрүҥэр (бокса, волейбол, көҥүл тустуу, гиирэ спорда, чэпчэки атлетика, мас-рестлинг, саахымат, дуобат, оҕунан ытыы) 1700 спортсмен-үөрэнээччи күөн көрсөрө күүтүллэр. Чэпчэки атлетика күрэхтэһиитэ Бэрдьигэстээх стадионугар ыытыллара былааннанна.

Спартакиада түмүгүнэн бастаабыт хамаанда – 250, иккистээбит хамаанда – 150 уонна үһүс миэстэлэммит хамаанда – 100 тыһ. солк. харчынан наҕарааланыахтара.

Тэрээһин кэмигэр спартакиада наҕараадаларын уонна тэрийээччилэр, судьуйалар, волонтердар кэтэр таҥастарын-саптарын көрдөрдүлэр, билиһиннэрдилэр. Ол курдук, кыайыылаахтарга сиэдэрэй көстүүлээх мэтээллэр, кубоктар, спартакиада ымыыта буолбут Бэдэр сымнаҕас оонньуура – барыта кэрэтик оҥоһуллубуттар. Маны тэҥэ, спартакиада хас биирдии кыттааччытыгар өйдөбүнньүк бэлэхтэр бэриллэр буолбуттара кэрэхсэбиллээх диэххэ сөп.

«Спортивные якутяне» иккис спартакиаданы сүрүннээн Саха Өрөспүүбүлүкэтин физическэй култуураҕа уонна успуорка итиэннэ үөрэххэ уонна наукаҕа министиэристибэлэрэ иилээн-саҕалаан тэрийэн ыыталлар.

Петр Павлов.

Ааптар хаартыскаҕа түһэриилэрэ.