Сонуннар

Ньургун Скрябиҥҥа биир хардыы тиийбэтэ

Көҥүл тустууга Олимпиадаҕа сүүмэрдиир бүтэһик, аан дойдутааҕы түһүлгэ түмүктэннэ. Эрдэ иһитиннэрбиппит курдук, манна саха тустууга кыһатын түөрт иитиллээччитэ кытынна. Кинилэртэн Виктор Рассадин уонна Айаал Лазарев бэйэлэрин иннилэригэр туруорммут сыалларын ситистилэр – олимпийскай путевкалары ыллылар.

Күрэхтэһии иккис күнүгэр, финалистарга хотторбуттар «уоскутар» бөлөххө киирэн күөн көрүстүлэр. Онуоха, американец Спенсер Лига хотторбут Владимир Егоров (57 кг) китаец Зоуга сатаан утарсыбата. Владимир бу күрэхтэһиигэ атаҕар эчэйиилээх кыттыбыт буолан, кыаҕын ситэ туһамматаҕа хомолтолоох.

Онтон бу күн иккис киһибит – көбүөр улахан үөрүйэхтээх маастара Ньургун Скрябин (65 кг) туох баар күүһүн-кыаҕын мунньунан кииристэ. Кини бэрт кылгас кэмҥэ утуу-субуу казах Аскаровы, кореец Кимы, украинец Арушаняны кыахтаахтык кыайталаан баран, олимпийскай путевка иһин тустууга аан дойду 70 киилэҕэ чемпиона американец Зейн Резерфордка күүһэ-кыаҕа тиийбэтэ. Онон сүрүн сыалын – биир хардыынан ситиспэтэ.

Түмүктээн эттэххэ, Турциятааҕы турнирга бөҕөстөрбүт ситиһиилээхтик кыттан, бэйэлэрин ыалдьааччыларын үөртүлэр, саха тустуута күүстээҕин өссө төгүл итэҕэттилэр.

«Уоскутар» бөлөх уонна олимпийскай путевка иһин тустуулар түмүктэринэн 57 кг – китаец Зоу Ванхао, 65 кг – американец Зейн Резерфорд, 74 кг – албанец Чермен Валиев, 86 кг – грузин Владимир Гамкрелидзе, 97 кг – китаец Авусайман Хабила, 125 кг – венгр Даниель Лигети сүүмэрдээһини ааһан, Парижтааҕы оонньууларга кыттар кыаҕы ыллылар.

PS: Ньургун Скрябин “уоскутар” бөлөххө тустууларын “Дьулурҕан” телеграмҥа страницатыгар t.me/dzulurgan көрүөххүтүн сөп.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

196900
Бүгүн : 273