Николай Тарскайга аналлаах медиа-портал  

Быйылгы дьыл ыам ыйын 8 күнүгэр Саха сиригэр спорт маассабай хамсааһынын саҕалаабыт, суолун тэлбит, спорт араас көрүҥнэригэр саҥалыы тыыны киллэрбит, Саха сиригэр көҥүл тустууну төрүттээбит биир дойдулаахпыт Николай Николаевич Тарскай 100 сыллаах үбүлүөйүн ис хоһоонноохтук, далааһыннаахтык бэлиэтиибит.

Кини төһө да кылгас олоҕу олордор, саха спордун историятыгар саҥа сүүрээннэри олохтоон уонна сайыннаран, урукку өттүгэр тэриллибитэх үтүмэн үлэни ыытан, саха спортменнара дойду, аан дойду таһымыгар тахсалларыгар, улахан түһүлгэлэргэ кыайыылаах-хотуулаах буолалларыгар бастакы олуктары уурбута.

Сонун буолбатах эрээри, билиҥҥи сайдыылаах үйэҕэ табыгастаах, түргэн тэтимнээх кэмҥэ чулуу дьоҥҥо, тэрилтэлэргэ, общественнай хамсааһыннарга куйаар ситимигэр сайт, портал оҥороллоро үгүс.

Портал диэн боростуойдук өйдөөтөххө, биир, эбэтэр хас да сирэйдээх, бэйэ-бэйэлэрин кытары сибээстээх куйаар ситиминэн үлэлиир площадка. Ол да иһин, дьон-норуот, ордук кэнчээри ыччат билиитэ хаҥыырыгар туһуланан, Н.Н. Тарскай аатын үйэтитиигэ үбүлүөйдээх сылга республика былааныгар киирбит биир сүрүн үлэнэн – киниэхэ аналлаах медиа-портал оҥоруута буолла.

“НИКОЛАЙ ТАРСКАЙ” медиа-порталы Уус Алдан улууһун кииннэммит библиотеката сүрүннээн оҥордо. Портал библиотека сайтыгар сүрүн сирэйгэ тиһилиннэ. Дойду араас муннуктарыттан хаһан баҕарар киирэн, Н.Н. Тарскай диэн кимин, туох өҥөлөөх, үлэлээх киһитин, кини туһунан хантан булуохха сөбүн, кини аатынан туох баарын барытын бу порталтан билиэхтэрин сөп. Портал биэс сүрүн сирэйдээх, онно киирдилэр олоҕун уонна үлэтин кэрчиктэрэ, кини туһунан кинигэлэр уонна хаһыат ыстатыйаларын матырыйааллара, хаартысканан галерея, урукку сыллартан уонна билиҥҥи кэмтэн видео матырыйааллар, кини аатын үйэтитиигэ ыытыллыбыт үлэлэр.

Быйыл Баатаҕай оскуолатыгар V төгүлүн ыытыллыбыт Н.Н. Тарскай аатынан научнай-практическай конференцияҕа 6-с кылаас үөрэнээччитэ Антон Татаринов “Чыпчаал” интерактивнай оонньуутунан кыттан, кыайыылааҕынан тахсан үлэтэ порталга тиһиллибитэ. Номнуо порталы туһанааччылар биһирэбиллэрин, кэрэхсэбиллэрин иһитиннэрбиттэрэ.

Үбүлүөйдээх сылынан эрэ муҥурдаммакка, инникитин бу порталы күүскэ сайыннарар, үлэлэтэр, баай фонданан хаҥатар былааннаахпыт. Ааҕааччыларбытын, республика олохтоохторун https://tarskiy.uacbs.ru/ порталы туһанаргытыгар ыҥырабыт!

Августина ПЕРМЯКОВА, М.К. Федорова аатынан Баатаҕай библиотекатын сэбиэдиссэйэ.