Николай Тарскай туһунан саҥа кинигэ күн сирин көрдө

Николай Николаевич Тарскай төрөөбүтэ 100 сылын көрсө «Николай Тарскай» диэн саҥа кинигэ күн сирин көрдө. Кинигэ – Саха сирин салалтатын үбүлээһининэн, «Айар» кинигэ кыһата тутан-хабан оҥорон таһаарыытынан, «Республика чулуу дьоно» сериянан өрөспүүбүлүкэтээҕи типографияҕа бэчээттэнэн таҕыста.

Кинигэни Н.Н. Тарскай аймаҕа, Саха Өрөспүүбүлүкэтин култууратын туйгуна, оҕону олоҥхоҕо уһуйуу маастар-педагога Наталья Иннокентьевна Мордовская уонна Россия Суруналыыстарын сойууһун чилиэнэ, «Дьулурҕан» хаһыат эрэдээктэрэ Петр Семенович Павлов бэчээккэ бэлэмнээтилэр. Бу дьоһун үлэ «Айар» кинигэ кыһатын уус-уран литератураҕа эрэдээксийэтин сэбиэдиссэйэ Екатерина Дмитриевна Сивцева көрүүтүнэн-истиитинэн оҥоһуллан таҕыста.

Бу кинигэҕэ биллиилээх судаарыстыбаннай, уопсастыбаннай диэйэтэл, Саха сиригэр физическэй култуура уонна успуорт сайдыытын төрүттээбит, Саха АССР Миниистирдэрин Сэбиэтин иһинэн физическэй култуураҕа уонна успуорка кэмитиэт бэрэссэдээтэлинэн үлэлээбит Николай Николаевич Тарскай олоҕун уонна үлэтин туһунан кэпсэнэр. Кини дакылааттара, киин уонна олохтоох бэчээккэ тахсыбыт ыстатыйалара, бииргэ үлэлээбит, алтыспыт дьонун, үөлээннээхтэрин, биир дойдулаахтарын, аймах-билэ дьонун ахтыылара киирдилэр.

«Николай Тарскай» кинигэ сүрэхтэниитэ ыам ыйын 8 күнүгэр – Н.Н. Тарскай төрөөбүт күнүгэр Саха Өрөспүүбүлүкэтин Бырабыыталыстыбатын 2 №-дээх дьиэтигэр күнүс 15:00 чаастан саҕаланар. Бу кэрэ бэлиэ түгэҥҥэ – Николай Николаевич Тарскай аатыгар сүгүрүйээччилэри, биир дойдулаахтарын, спорду таптааччылары, куорат олохтоохторун уонна ыалдьыттары барыгытын ыҥырабыт.

«Дьулурҕан».