Сонуннар

Күрэхтэһиигэ кыттарбыт сүрдээх улахан эппиэтинэс 

Быйыл сайын биһиги Сахабыт сиригэр аан дойдутааҕы «Азия оҕолоро» спортивнай оонньуулар 8-с төгүлүн ыытыллаллар. Бу улахан суолталаах күрэхтэһиигэ саамай  дьулуурдаах, чулуу спортсмен оҕолор кыттан, Сахабыт сирин чиэһин көмүскүөхтэрэ.

Биһиги, И.М. Яковлев аатынан Покровскай 1 №-дээх орто оскуолабыт бастыҥ спорсменнара эмиэ кытталлар. Соторутааҕыта мин оннук икки спортсмен кыыһы кытта кэпсэттим. Петрова Дарианна уонна Пахомова Юлиана 9 “б” кылаас үөрэнээччилэрэ,  тхэквондо көрүҥэр кыттаары эрчиллэ сылдьаллар. Кыргыттар өрөспүүбүлүкэ, Дальнай Восток, Арассыыйа араас таһымнаах күрэхтэһиилэригэр кыттаннар, кэккэ ситиһиилэрдээхтэр, бастакы спортивнай разрядтаахтар. Тренердэрэ – Эверстов Ангел Николаевич спорсменнары “Хотой” спортивнай саалаҕа утумнаахтык дьарыктыыр, эрчийэр.

-Дьарыккыт туһунан кэпсээҥ эрэ. Хаһааҥҥыттан дьарыктанаҕытый?

-Тхэквондонан биһиги иккис кылаастан дьарыктанабыт.

-Тоҕо бу көрүҥү таллыгыт?

-Бастаан төрөппүттэрбит сүбэлээбиттэрэ. Онтон дьарыктанан киирэн баран, спорт бу көрүҥүн олус сөбүлээбиппит. Билигин тхэквондо биһиги олохпутугар бигэтик киирбит эбии дьарыкпыт буолар.

-Бу тхэквондо, мин санаабар, ордук уолаттарга барсар курдук. Бу спорт көрүҥэ эһиэхэ тугу сайыннарарый?

-Түргэн, күүстээх, сымса буоларга, кыайыыга дьулууру сайыннарар дии саныыбыт.

-Туох ыарахаттардааҕый?

-Ыйааһыны биир тэҥник тутарга ыарахан. Ол аата, физическэй формаҕын сүтэрбэккэ, сөпкө тута сылдьахтааххын – ол ордук ыарахан. Аһыыр аскын-үөлгүн куруук көрүнэҕин, хонтуруолланаҕын. Иллэҥ бириэмэбит суоҕун кэриэтэ, онон күммүтүн эрдэттэн үчүгэйдик былаанныыбыт, элбэҕи ситиһэ сатыыбыт.

-Бу, «Азия оҕолоро» оонньууларга кыттаргыт эһиэхэ туох суолталааҕый?

– Күрэхтэһиигэ кыттарбыт сүрдээх улахан эппиэтинэс. Биһиги бэйэбитин эрэ буолбакка,  бүтүн Саха сирин аатын көмүскүүбүт. Хас биирдии спортсмен кыайыыга дьулуһар, биһиги эмиэ кыайыахпытын баҕарабыт.

Мин Юлианаҕа уонна Дарианнаҕа ситиһиини, кыайыыны баҕарабын.

Аман ЕРЕМЕЕВ, И.М. Яковлев аатынан Покровскай 1 №-дээх орто оскуолатын 8-с кылааһын үөрэнээччитэ.

Добавить комментарий

Ваш адрес email не будет опубликован. Обязательные поля помечены *

196897
Бүгүн : 270