ХИФУ бастаата

Дьокуускай. «Кыайыы 50 сыла» Спорт дыбарыаһыгар Саха Республикатын бастакы президенэ Михаил Ефимович Николаев кэриэһигэр студеннарга Россия спортивнай тустууга чемпионатын көҥүл тустууга күрэхтэһиитэ ыытыллан түмүктэннэ. Тустуу бу көрүҥэр барыта 23 үөрэх кыһатын бөҕөстөрө күөн көрүстүлэр.

Икки күннээх тыҥааһыннаах хапсыһыылар кэннилэриттэн, толору састаабы туруорбут М.К. Аммосов аатынан Хотугулуу Илиҥҥи федеральнай университет хамаандата (тренердэр Вячеслав Ефремов, Егор Старостин) эрэллээхтик бастаата.

Университет хамаандатыттан Станислав Свинобоев (74 кг) бастакы, Алексей Копылов (57 кг), Александр Авелов (61 кг), Александр Иванов (70 кг), Андриан Ленскэй (86 кг), Никита Софронов (92 кг), Никита Хабаров (125 кг) үһүс миэстэлэри ыллылар.

Иккис миэстэни Чурапчытааҕы физическэй култуура уонна спорт государственнай институтун хамаандата (тренер Кирилл Захаров) ылла. Чурапчылартан Олег Фомин (70 кг) чемпион, Любомир Ашеин (57 кг) иккис, Ньургун Терентьев (61 кг), Эдуард Попов (65 кг), Константин Капрынов (74 кг), Анатолий Никитин (79 кг) үһүс буоллулар.

Үһүс бириистээх миэстэҕэ Хотугу Осетия государственнай университета (хамаанда тренерэ Вячеслав Багаев) таҕыста. Кинилэр үс чемпионнаахтар, онтон биирэ – биһиги биир дойдулаахпыт, Үөһээ Бүлүү ыччата Харысхан Баппаҕай ыарахан ыйааһыҥҥа тэҥнээҕин булбата.

Эмиэ үс чемпионнаах эрээри, хамаандата ситэтэ суоҕунан, Тыва государственнай университета төрдүс миэстэҕэ тигистэ. Салгыы миэстэлэри Бурятия, Красноярскай, Воронеж… үөрэххэ кыһаларын хамаандалара ыллылар.

Ыйааһын ахсын кыайыылаахтар ХИФУ ректора Анатолий Николаев аатыттан сахалыы чорооннорунан, мэтээллэринэн, дипломнарынан наҕараадаланнылар. Онтон бастыҥ хамаандалар анал кубоктарынан, дипломнарынан бэлиэтэннилэр.

Чемпионат түмүгүнэн бастыҥнар – студеннар сайыҥҥы спортивнай оонньууларыгар уонна эһиилги Россия чемпионатыгар киирэр быраабы ыллылар.

М.К. Аммосов аатынын Хотугулуу Илиҥҥи федеральнай университет салалтата көҥүл тустууга болҕомто ууран өйүүрүн иһин улахан махтал! Бу чемпионат биһиэхэ ыытыллыытын ХИФУ иһинэн физическэй култуура уонна спорт институтун ректора Николай Гоголев, ХИФУ студеннар спортарын киинин салайааччыта, Бүтүн Россиятааҕы студеннар спортивнай союзтарын Саха сиринээҕи сэбиэтин председателэ Александр Черкашин биир сыл устата сыныйан туруулаһан, үрдүк таһымнаахтык тэрийэн ыыппыттарын бэлиэтиир тоҕоостоох. Биһиги университеппыт көҥүл тустууга хамаандата төрдүс сылын дойдуга эриэ-дэхси көрдөрүүнү ситиспитинэн эҕэрдэ!

Бэйэбитигэр кэлэн биэрбит тустууну дуоһуйа көрдүбүт. Бөҕөстөрбүт сытыы, тыҥааһыннаах хапсыһыылары ыытан, кыайыыны ситиһэн, бэйэлэрин күүстэригэр эрэллэрэ күүһүрэригэр, бу күрэхтэһии туһалаах буолбута мэлдьэһиллибэт.

Петр ПАВЛОВ.

Ааптар хаартыскаҕа түһэриитэ.