Сонуннар

Энтузиаст-саахыматчыт кэриэһигэр

Аҕыйах хонуктааҕыта Саха Республикатын норуотун хаhаайыстыбатын үтүөлээх үлэhитэ, республика үөрэҕириитин туйгуна, энтузиаст-саахыматчыт Иннокентьев Николай Васильевич төрөөбүтэ 90 сылыгар анаммыт бэтэрээннэр икки ардыларыгар турнир ыытылынна.

Эдэр бэтэрээннэргэ Владимир Таппыров, Иванов Андрей, Румянцев Степан, cаастаах бэтэрээннэргэ Николаев Николай, Павлов Петр, Протодьяконов Семен кыайдылар. Дьахталларга эдэр бэтэрээннэргэ быйылгыттан күрэхтэhиигэ кыттар, саахымат кулуубугар үhүс көлүөнэ оскуолатыгар иккис сылын дьарыктанар Светлана Егорова чемпионнаата, Анна Слепцова үhүс призер буолла, иккис миэстэни Наталья Андреева ылла. Саастаах бэтэрээннэргэ опыттаах саахыматчыттар Наталья Трифонова, Мария Фомина, Cветлана Захарова инники күөҥҥэ таҕыстылар.

Бары кыайыылаахтар Н.В. Иннокентьев дьиэ кэргэниттэн кубоктары, мэтээллэри, грамоталары, сыаналаах бириистэри тутан үөрэн-көтөн тарҕастылар.

Николай Васильевич Иннокентьев туһунан билиһиннэрдэххэ, кини 1934 сыллаахха Ньурба улууһугар Бэстээх нэһилиэгэр төрөөбүтэ. Саха Республикатын норуотун хаһаайыстыбатын үтүөлээх үлэһитэ, СР үөрэҕириитин туйгуна. Дьокуускайдааҕы педагогическай колледж саахымакка тренеринэн үлэлээбитэ.

Саахымакка ССРС спордун маастарыгар кандидат, республикатааҕы категориялаах судьуйа этэ. Дьокуускай куорат чемпионатыгар бастыы сылдьыбыта. “Саахымат хонууларын тула сахалар ыллыктара” диэн кинигэ (2007) ааптара.

Николай Васильевич биһиги кэккэбититтэн 2014 сыллаахха өлөн туораабыта.

Петр Яковлев.

Добавить комментарий

Ваш адрес email не будет опубликован. Обязательные поля помечены *

196910
Бүгүн : 283