“Азия оҕолоро” оонньуу чөмпүйүөнэ

Аан бастакы «Азия оҕолоро» норуоттар икки ардыларынааҕы спортивнай оонньуулар 1996 сыллаахха, аныгы кэм Олимпийскай оонньууларын 100 сылыгар ананан, Дьокуускайга ыытыллыбыттара.

«Оҕо норуодунай дипломатиятын» бырайыагын көҕүлээччинэн Саха Өрөспүүбүлүкэтин Бастакы бэрэсидьиэнэ Михаил Николаев буолбута. «Азия оҕолоро» норуоттар икки ардыларынааҕы спортивнай оонньууларын тѳрүттээhиҥҥэ, ыытыыга уонна киэҥ эйгэҕэ таhаарыыга өҥөтүн иhин, Михаил Ефимович бу оонньуулары төрүттээччи быhыытынан билиниллибитэ.

Саха Өрөспүүбүлүкэтин Ил Дархана Айсен Николаев: «Михаил Николаев 1996 сыллаахха бастакы «Азия оҕолоро» оонньуулары толкуйдаабытыгар уонна ыыппытыгар инникитин бу туохха кубулуйуоҕун үгүстэр өйдөөбөт да этилэр. Оттон «Азия оҕолоро» билигин, 2024 сылга, Арассыыйа сиригэр-уотугар бөдөҥ спортивнай күрэхтэhиилэринэн буолуохтара», — диэн бэлиэтээбитэ.

«Азия оҕолоро» оонньуулар Азия дойдуларын уонна Арассыыйа эрэгийиэннэрин 17-гэр диэри саастаах эдэр спортсменнарын түмэр, эйэни, доҕордоhууну бөҕөргөтөр уонна чөл олоҕу пропагандалыыр сыаллаах ыытыллар. Бастакы оонньууларга кыттыбыт оҕолортон биhиги биллэр-көстөр, ааттаах-суоллаах дьоммут үүнэн тахсыбыттара.

Ол курдук, Амма улууһун Аҕа баһылыга – Степан Николаевич Кузьмин дойдутун дьонугар-сэргэтигэр үтүө холобур буолар. 2004 сыллаахха Дьокуускай куоракка ыытыллыбыт «Азия оҕолоро» оонньууларыгар мас тардыһыы көрүҥэр чөмпүйүөн үрдүк аатын сүкпүтэ. Ол туһунан, Степан Николаевич маннык сэһэргиир:

«2004 сыллаахха “Азия оҕолоро» оонньууларга кыттыбытым. Спорка кыайыы үөрүүтүн-өрөгөйүн бастаан онно билбитим. Кэлин үлэһит киһи буолан үүнэн тахсарбар, бу кыайыым улахан оруолу оонньообута. Билигин даҕаны, уруккутун курдук күүскэ буолбакка дьарыктанабын, спорт саалатыгар иллэҥ кэммэр сылдьабын. Баһылык буоларым быһыытынан, улууска спорт сайдарыгар улахан болҕомтобун уурабын, болҕомто ууруллуохтаах даҕаны. Хас биирдии киһи доруобуйатын көрүнэн эрчиллиэхтээх, чөл олоҕу тутуһуохтаах. Билиҥҥи бириэмэҕэ спорка болҕомто күүскэ ууруллан, араас улахан таһымнаах күрэхтэһиилэр ыытылланнар, улууспутугар сүрдээх элбэх спортивнай объектар тутуллуннулар.

Быйыл ыытыллыахтаах “Азия оҕолоро” оонньууларга кыттар оҕолору – кыайыылаахтар диэххэ наада, кинилэр республика лидердэрэ. Республика сүүмэрдэммит хамаандатыгар киирии улахан үлэттэн тахсар, элбэх күрэхтэһиини ааһан, бастыҥтан бастыҥнар талыллаллар.

Кытттааччыларга өссө утумнаахтык дьарыктанан, буолаары турар норуоттар икки ардыларынааҕы оонньууларга республикаларын аатын ситиһиилээхтик көмүскүүллэригэр баҕарабын. Бары күүһү, болҕомтону ууран дойдуларын аатын ааттатыахтара диэн эрэнэбин», – диэн аҕа баһылыкпыт бэйэтин баҕа санаатын үллэһиннэ.

Владислав ДЬЯЧКОВСКАЙ, Л.В. Киренскэй аатынан Амматааҕы лиссиэй 10-с кылааһын үөрэнээччитэ, «Амма кэскилэ» оҕо уопсастыбаннай хамсааһын чилиэнэ.