Сонуннар

Арассыыйа чемпионатыттан санаалар

Дьэ, бу күннэргэ муус устар 30 күнүттэн ыам ыйын 4 күнүгэр диэри Москва уобалаһыгар Одинцово куоракка көҥүл тустууга Арассыыйа чемпионата ыытылынна. Уопсайа 23 уолбут, 6 кыыспыт тахсан күүстэрин холонон туһуннулар.

Кыргыттартан: Александра Копылова, Севиль Назарова, Евгения Огородникова, Светлана Васильева, Надежда Галдина уонна Лилиана Рожина. Итинтэн 59 киилэ ыйааһыҥҥа Евгения Огородникова үһүс бочуоттаах миэстэни ылан, боруонса мэтээли кэттэ.

Онтон уолаттарбытыттан, 57 киилэҕэ Алексей Копылов, Уйгулаан Иванов, Любомир Ашеин, Фёдор Постников уонна Лев Павлов кыттыыны ыллылар. 61 киилэҕэ Пётр Константинов, Александр Авелов, Манчаары Ильинов, Михаил Иванов, Виктор Яковлев туһуннулар. 65 киилэҕэ Дьулусхан Тотонов.

Салҕыы 70 киилэҕэ Албан Аввакумов, Владимир Бояновский, Олег Фомин, Константин Капрынов уонна Айсен Потапов.

74 киилэ ыйааһыҥҥа Николай Сивцев, Иннокентий Бабаранов уонна Станислав Свинобоев.

92 киилэҕэ Никита Софронов, Ньургун Сергин, Максим Толмачёв.

Ыарахан ыйааһыҥҥа (125 кг) Никита Хабаров туһуннулар.

Олортон 61 киилэ ыйааһыҥҥа дылы, Виктор Яковлев уонна Оренбург куораттан тустар бэйэбит бөҕөспүт Яков Павлов боруонса иһин кииристилэр. Ол түмүгүнэн, 21 саастаах Виктор Яковлев кыайан-хотон тахсан, олоҕор маҥнайгы Арассыыйа чемпионатыгар боруонса мэтээли түөһүгэр кэтэр чиэскэ тигистэ.

Онтон 57 киилэ ыйааһыҥҥа бэрт соһуччу, сэргэхтик, итэҕэтиилээхтик эрэнэр, инникилээх бөҕөспүт 20 саастаах Лев Павлов, эмиэ олоҕор маҥнайгы улахан дьоҥҥо Арассыыйа чемпионатыгар сүрэхтэниитигэр үрүҥ көмүс мэтээли  бэйэтин суотугар сурунна. Бастакы эргииргэ Уйгулаан Иванову 4:0 ахсааҥҥа баһыйа тутан, салҕыы Начын Монгушка, Тыва биир бастыҥ бөҕөһүгэр тахсан, бүтэһик сөкүүндэлэргэ “кочерга” диэн албаһы оҥорон кыл мүччү 2:2 ахсааҥҥа кыайан, салҕыы тустар быраабы ылар. Ол кэнниттэн, Дагестан тустуугун Муса Мехтихановы 2:1 ахсааҥҥа кыайа-хото тутан, кыһыл көмүс мэтээл иһин киирсиигэ Ахмед Идрисовка сабырыйтаран, иккис бочуоттаах миэстэни Лев Павлов ылла.

Саха сирэ бүттүүнэ Арассыыйа чемпионатыттан финалы сэттэ төгүрүк сыл кэтэһэн-кэтэһэн быйыл дьэ көрдүбүт-иһиттибит. Бэлиэтээн эттэххинэ, бу тоҕус күн иһигэр, эдэркээн уолбут Лев Павлов икки улахан күрэхтэһиилэргэ тустан, пьедестал үрдүкү чыпчаалыгар таҕыста. Онон кини самныбат, күүстээх санаатын, баҕатын, дьаныарын, сыратын, эппиэтинэстээх сыһыанын көрдөрөн туран, хара көлөһүнүн тоҕон, олох бүтэһигэр, тиһэҕэр диэри үлэлээн, бэйэтигэр эрэнэн, туохтан да самныбакка, чаҕыйбакка маннык ситиһиигэ таҕыстаҕа. Бу киһи үтүө, дьоһун хаачыстыбатын көрдөрөр өрүттэрэ өссө да инникитигэр кыайыыга кынаттыы туралларыгар баҕарабын. Чугас дьоно, аҕата Павлов Семён Андреевич, тус тренерэ Николай Романович, Герман Степанович, Александр Николаевич бу үөрүүлээх быһыыга-майгыга сүрүн кылааттара үгүс буолара чуолкай бөҕө буоллаҕа.

Онон Саха норуота сүрдээҕин Левка бары сайаҕастык сахалыы сэмээр, хайа баҕар түгэҥҥэ ыалдьабыт, уолбутугар күүс-көмө, өйөбүл, тирэх буоларбытын умнубаппыт диэн алгыс тылбын этэбин. Онтон уопсай хартыынаны этэр эбит буоллаххына, былырыыҥҥы чемпионаттан уолаттарга үксүлэригэр эбиллии барбыта тутатына биллэ көстөр, онон салҕыы өссө күүстээх, дьаныардаах дьарыктар иннилэригэр турдахтара. Өссө да инникитигэр үрдүк ситиһиилэр, кыайыылар-хотуулар, дабайыылар кэлэ туралларыгар баҕарабын.

Милена АНДРЕЕВА, ХИФУ студентката.

Добавить комментарий

Ваш адрес email не будет опубликован. Обязательные поля помечены *

196895
Бүгүн : 268