Сонуннар

Тустууктар дуобакка күннээтилэр

Бүгүн, сахалартан Советскай Союзка көҥүл тустууга уолаттарга бастакынан чемпионнаабыт, Дуобат-саахымат киинин дириэктэринэн үлэлии сылдьыбыт Вячеслав Павлович Карпов кэриэһигэр нуучча дуобатыгар республикатааҕы иккис турнир бэрт ситиһиилээхтик ыытыллан түмүктэннэ.

Кэрэхсэбиллээҕэ баар, турнир ыытыллыыта – Вячеслав Павлович Карпов төрөөбүт күнүгэр сөп түбэспитэ буолар. Күрэхтэһиигэ оҕотуттан кырдьаҕаһыгар тиийэ элбэх киһи кэлэн кыттыбыта, тэрээһин таһымын үрдэтэн биэрдэ. Кинилэр туспа бөлөхтөргө арахсан оонньоон, кыайыылаахтары быһаарыстылар.

Күрэхтэһиини үөрүүлээхтик аһыыга Саха сирин физическэй култуураҕа уонна спорка министрин солбуйааччы Гаврил Мохначевскай, өр сылларга дуобат федерациятын ситиһиилээхтик салайбыт Владимир Кычкин, В.П. Карповы кытта бииргэ үөрэммит Альбина Поисеева, Саха сирин спорка салайааччытын тахсыылаахтык үлэлии сылдьыбыт Виктор Ноговицын, Чурапчы улууһун Чакыр нэһилиэгин баһылыга Константин Лебедев, В.П. Карпов олоҕун аргыһа Татьяна Карпова, СР физическэй култуураҕа уонна маассабай спорка управлениетын начаалынньыга Роман Оконешников уо.д.а. кыттыыны ыллылар.

Бу тэрээһин чэрчитинэн тустууктар уонна кикбоксердар икки ардыларыгар дуобакка табаарыстыы көрсүһүү ыытыллыбыта, дьону-сэргэни сэргэхситтэ. Онуоха түөрт дуоскаҕа утары көрсүүгэ көҥүл тустууга аан дойду чемпиона, республика сүүмэрдэммит хамаандатын тренерэ Герман Контоев хапытааннаах тустууктар хамаандалара 4:0 ахсаанынан кыайыыны ситистилэр. Герман бэйэтин дуоскатыгар кикбоксиҥҥа Россия уонна Европа чемпиона Вадим Колтовскойу хотто. Тустууктар хамаандаларын састааба: Герман Контоев, Алексей Захаров, Константин Конощук, Игорь Тарасов, Ньургун Чоросов.

Кыайыылаах хамаандаҕа Гаврил Мохначевскай уонна күрэхтэһии сүрүн судьуйата, гроссмейстер Александр Азаров – өйдөбүнньүк кубогы, грамоталары уонна бириистэри туттардылар.

Дьахталларга, эр дьоҥҥо уонна бэтэрээннэргэ сүрүн бөлөхтөрү тэҥэ, балаһыанньа быһыытынан тустууктарга анаан туспа бөлөххө күрэхтэһии ыытыллыбытыгар Чурапчыттан анаан-минээн, ааттаан-суоллаан, убайдара Вячеслав Павловиһы кэриэстээн, эдэрдэригэр күүскэ туста сылдьыбыт ССРС спордун маастардара Адам Таныков уонна Афанасий Захаров кэлбит сыалларын-соруктарын ситиһэн, иккиэн суостаах утарсааччыларын кыайталаан, эдэр саастарын эргитэн пьедесталга таҕыстылар, илии тутуурдаах, өттүк харалаах бардылар.

Бөлөхтөргө кыайыылаахтар анал мэтээллэринэн, грамоталарынан уонна сыаналаах бириистэринэн наҕараадаланнылар. Ону таһынан, биирдиилээн бастыҥ оонньооччуларга Чакыр нэһилиэгэ олохтообут анал бириистэрэ туттарылыннылар.

Онон, көҥүл тустууга ССРС, хапсаҕайга Саха АССР спортарын маастара, дуобакка спорт маастарыгар кандидат, Д.П. Коркин аатынан Саха Республикатын Государственнай бириэмийэтин лауреата, Чурапчы улууһун бочуоттаах гражданина Вячеслав Павлович Карпов аатын үйэтитиигэ бэртээхэй тэрээһин ыытылынна. Онуоха Дуобат уонна саахымат республикатааҕы киинэ (дириэктэр, гроссмейстер Матрена Ноговицына) күрэхтэһиини кыайа-хото тутан ыыппытын бэлиэтиир оруннаах.

Күрэхтэһии түмүгэ:    

Бэтэрээн эр дьоҥҥо: 1. Иван Новгородов (Чурапчы), 2. Василий Куприянов (Мэҥэ Хаҥалас), 3. Иван Щукин (Таатта).

Бэтэрээн дьахталларга: 1. Анастасия Собакина (Чурапчы), 2. Мария Бырдыннырова, 3. Лариса Никифорова (иккиэн – Дьокуускай).

Эр дьоҥҥо: 1. Иван Павлов (Дьокуускай), 2. Василий Прокопьев (Нам), 3. Архан Титов (Амма).

Дьахталларга: 1. Дайаана Кондратьева, 2. Саяника Кондратьева, 3. Альбина Колодезникова (үһүөн – Дьокуускай).

Тустууктарга: 1. Адам Таныков, 2. Афанасий Захаров (иккиэн – Чурапчы), 3. Николай Платонов (Мэҥэ Хаҥалас).

Петр ПАВЛОВ.

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *

196901
Бүгүн : 274