Сонуннар

Саахыматчыттарбыт ситиһиилэрэ сөптөөхтүк сыаналанна

Соторутааҕыта Екатеринбург куоракка эдэрдэргэ Россия саахымакка күрэхтэһиитэ буолан ааспыта. Күрэхтэһии икки нэдиэлэ ыытыллыбыта. Манна биһиги спортсменнарбыт дьоһун көрдөрүүнү ситиспиттэрэ. Ол курдук, Арсений Чумаевскай 19-гар диэри саастаахтарга классическай оонньууга иккис миэстэни ылбыта.

Бу, Саха сирин спорка историятыгар билиҥҥитэ саҥа, бастакы ситиһии. Ол эбэтэр, биһиги саахыматчыттарбытыттан өссө ким даҕаны маннык көрдөрүүнү ситиһэ илигэ. Бу ситиһиитинэн Арсений – Россия сүүмэрдэммит хамаандатын састаабыгар киирдэ.

Кыргыттар бөлөхтөрүгэр Арина Васильева төрдүс миэстэҕэ тахсыбыта. Манан Арина эһиил Россия күрэхтэһиитин үрдүкү лигатыгар кыттар быраабы ылла.

Саахымат композициятын суоттааһыҥҥа Полина Пак кыһыл көмүс, Арина Васильева боруонса мэтээллэри ылан, дьоһун ситиһиилэннилэр. Онон Екатеринбургдааҕы күрэхтэһиигэ эдэр спортсменнарбыт биирдии кыһыл көмүс, үрүҥ көмүс уонна боруонса мэтээллэри ылары ситистилэр.

Саахыматчыттарбыт бу ситиһиилэрин сыаналаан, Бэчээт дьиэтигэр пресс-конференция тэрилиннэ. Манна Саха Республикатын физическэй култуураҕа уонна спорка министрин бастакы солбуйааччы Александр Бугаев, СР саахымакка федерациятын салайааччыта Владимир Егоров, саахымат тренерэ Роман Ганжуров уонна чаҕылхай ситиһиилэммит саахыматчыттар Арсений Чумаевскай, Арина Васильева, Полина Пак кыттыыны ыллылар.

Маны тэҥэ көрсүһүүгэ Хабаровскайга буолбут Дальнай Восток федеральнай уокуругун чемпионатыгар ситиһиилээхтик кыттыбыт Владислав Жирков уонна Альберт Постников кытыннылар. Манна сыһыары тутан эттэххэ, бу чемпионаттан саахыматчыттарбыт сэттэ мэтээллэммиттэрэ.

Кэнники кэмҥэ саха саахыматчыттара араас таһымнаах күрэхтэһиилэргэ эриэ-дэхси көрдөрүүнү ситиһэн, сэргэхсийиини үөскэттилэр. Александр Бугаев эппитинэн, билигин республикаҕа 8 тыһ. киһи саахыматынан дьарыктанар. Бу, спорт маассабай буолуутугар үчүгэй көрдөрүү. Аны гроссмейстердар кыттыылаах, улахан бириистээх Ил Дархан Кубога тэриллэн, саахымат сайдыытыгар улахан үктэли оҥордо диэххэ сөп. Бу барыта СР салалтатын, Спорка министиэристибэтин өйөбүлүнэн, болҕомто ууруутунан ситиһилиннэ.

Бүгүн республика саахымакка федерациятын СР үүнэр көлүөнэҕэ фондатын генеральнай дириэктэрэ, норуот депутата Владимир Анатольевич Егоров салайар. Спорт бу көрүҥэр федерация айымньылаах үлэтинэн республикаҕа саахымат сайдар. Араас улахан таһымнаах күрэхтэһиилэр ыытыллаллар, гроссмейстердар оскуолалара үлэлиир, оҕолору кытта үлэ эмиэ көдьүүстээхтик барар. Ол түмүгэр аҥардас кэнники сылларга улахан дьон саахымакка күрэхтэһиилэригэр үөрэнээччилэр «былааһы ылаллар». Бу, кэскиллээх көстүү…

Пресс конференцияҕа Россия күрэхтэһиитигэр уонна Дальнай Восток чемпионатыгар кыттыы туһунан билиһиннэрдилэр. Түмүккэ, ити күрэхтэһиилэргэ ситиһиилээхтик кыттыбыт спортсменнарга: Арсений Чумаевскайга, Арина Васильеваҕа, Полина Пакка, Владислав Жирковка, Альберт Постниковка, тренер Роман Владимирович Ганжуровка – СР физическэй култуураҕа уонна спорка министиэристибэтин уонна СР саахымакка федерациятын ааттарыттан Махтал суруктар, харчынан бириэмийэлэргэ туоһу суруктар туттарылыннылар.

Петр ПАВЛОВ.

Ааптар хаартыскаҕа түһэриитэ.      

Добавить комментарий

Ваш адрес email не будет опубликован. Обязательные поля помечены *

186562
Бүгүн : 266