Сонуннар

Лев Павлов финалга тустуоҕа

Чечня Республикатын киин куоратыгар Грознайга, 21-гэр диэри саастаахтарга Россия көҥүл тустууга биирдиилээн бастыыр иһин күрэхтэһиитэ ыытылла турар. Бу күрэхтэһиигэ Саха сириттэн 18 эдэр бөҕөс тиийэн күөн көрсө сылдьар.

Бу саастаах тустууктарга тумус туттар уолбут – Россия түһүлгэтин кыайыылааҕа, Сунтаар ыччата Лев Павлов буолар. Кини 57 киилэҕэ бурят Пурбо Эрдинеевы 3:0, бэйэтин киһитэ Михаил Осиповы 10:0, москвич А.Калибатовы 2:0, дагестанец Магомедсаид Османовы 9:0 ахсааннарынан эрэллээхтик кыайталаата.

Онон бүтэһик быһаарыылаах киирсиигэ кини дагестанец Халид Магомедовы кытта көрсөр буолла. Санатан эттэххэ, Лев бу бөҕөһү быйыл, сахаттан бастакы олимпийскай чемпион Р.М. Дмитриев аатынан норуоттар икки ардыларынааҕы турнирга уонна былырыын Дьокуускайга ыытыллыбыт Россия күрэхтэһиитин финалыгар кыайан турар. Бу да сырыыга кыайарыгар эрэллээхпит.

Өссө, бэҕэһээҥҥи күн түмүгүнэн Василий Григорьев (65 кг) боруонса мэтээл иһин, онтон Михаил Осипов (57 кг) уонна Виталий Ефремов (86 кг) «уоскутар» бөлөххө киирэн тустуохтара.

Бүгүн биһиги уолаттарбытыттан Андрей Мидловец, Андрей Щеглов, Эдуард Попов, Артем Слепцов (61 кг), Роман Николаев, Михаил Павлов (79 кг), Михаил Нестеров (125 кг) күрэхтэһиини саҕалыахтара.

Күрэхтэһии бүгүн Дьокуускай бириэмэтинэн 17:00 саҕаланар. Онтон финаллар программа быһыытынан 23:30 чаастан саҕаланыахтара.

Уолаттарбытыгар ситиһиилээх тустууну баҕарабыт!

«Дьулурҕан».

Добавить комментарий

Ваш адрес email не будет опубликован. Обязательные поля помечены *

196899
Бүгүн : 272