Сонуннар

Көтөр мээчик үөрүү көтөлүн аҕалла

// Хатаска түөлбэлэр волейболга күрэхтэстилэр

Туох тыынар-тыыннаах барыта ханна эрэ хорҕойор, олохсуйар, силис-мутук тардынар, ону дойдум, мин сирим-уотум диэн билинэр. Саха киһитэ Ийэ сиригэр, Аҕа дойдутугар дойдумсах майгытынан кэрэхсэнэр. Дьэ ол сиргин-уоккун, хахха-дурда буолар абыралын туһугар бэриниилээх буолууга иитэр-үөрэтэр, бииргэ түмэр, сомоҕолуур ньымалартан биирдэстэрэ чөл-чэгиэн туругу уруйдуур-айхаллыыр түөлбэлэр икки ардыларыгар ыытыллар спартакиада Хатаспытыгар быйыл “Байанай” күрэҕиттэн саҕаламмыта. 

Ол кэнниттэн бэҕэһээҥҥи күнтэн волейбол саҕаланна. Бу күнү, бу үөрүүнү нэһилиэкпит хас биирдии ыала күүппүтэ диэтэхпитинэ омун буолбатах.  Этиллибит кэмҥэ “Дьулуур” спортивнай саалабыт киэҥ уораҕайыгар тохтоло суох дьон киириитэ-тахсыыта, устар сүүрүктүү субуллуута, кэлиитэ-барыыта оҕо аймах күлүүтэ-салыыта, көрсүспүттэн үөрүүтэ, алтыспыттан астыныыта кими баҕарар сүргэтин көтөҕүөх курдук эйгэтэ олохтонно. Түөлбэ салайааччылара, хамаанда хапытааннара барахсаттар хамаанда толору буолуутугар кыһаллан дьону-сэргэни кими көрдөһөн, кими ким эрэ нөҥүө булан, олорор сирин чуолкайдаан, көрдөһүү-ирдэһии, форма булуута, оҥостуута, саҥа кэлбит дьону кытта билсиһиитэ, этэргэ дылы нэһилиэк иһэ оргуйан олорор.

Ханнык эрэ сылларга волейболга киһи кыайан көстүбэккэ эр дьону кытта дьахталлары кытта холбуур эбит буоллахха, бу сырыыга хас биирдии түөлбэттэн эр дьон, дьахтар хамаандатын тус туһунан буллубут. Волейболга эдэр ыччат бэркэ кэлбит. Хамаандалар дьонноругар саҥа дьон бөҕө кэлбиттэр. Манна дьиэ-кэргэнинэн толору кэлбиттэр бааллар: Саввинов Эдуард Николаевич кэргэнинээн Саргылана Петровналыын, кыыстара Ульяналыын, Окороков Михаил Спартакович уолаттарынаан Айуоллуун, Сергейдиин, бииргэ төрөөбүттэр Күннэй Уваровская Степанидалыын, Людмила Моисеева уолунаан, балтынаан Надежда Филипповалыын, Алексей Оконешников уолунаан Егордуун, Наталья Бурцева уолунаан Мишалыын, Дарья Герасимова уолунаан Аманныын, Акулина, Алена Корякиналар, Светлана, Ольга Соловьевалар (Шишкина, Чичигинарова), аймахтыы Татьяна, Сайыына Кондратьевалар, Николай Баишев уолунаан Алексейдыын, эдьиийдии балыстыы Павловалар, уо.д.а.

Бу күннэргэ Вячеслав Тимофеев элбэхтэ ааттанна, кырдьыга да оннук кини эрчийбит, үөрэппит оҕолоро хас даҕаны хамаандаҕа сүрүн оонньооччунан сылдьаллар, Татьяна Афонина, Михаил Андреев бэйэлэрин үөрэнээччилэрин кытта утары хамаандаҕа оонньоотулар. Ону таһынан ааттаах суоллаах волейбольнай улуустартан кэлэн олохсуйбут саҥа бэртээхэй оонньооччулар бааллара көһүннэ.

Түөлбэ салайааччыларыгар: Иванов Герман Ксенофонтовичка, Попов Николай Семненовичка, Ефимова Александра Петровнаҕа, Никифорова Туйаара Васильевнаҕа, Андросов Николай Михайловичка, Мокрощупова Антонина Семеновнаҕа, Осипов Алексей Дмитриевичка уонна кинилэр көмө-тирэх дьонноругар сүгүрүйэ махтанабыт. Пермяков Евгений Петрович салайааччылаах олохтоох дьаһалтаҕа, чуолаан Игнатьев Семен Семенович маассабай спорт сайдыытыгар ураты болҕомто уураллара хайҕаллаах суол.

Күрэхтэһии түмүгэ тугу көрдөрдө? Түмүк сүрэҕи дууһаны сылаанньытар диэҕи баҕарыллар – дьон чөл, чэгиэн олоххо тардыһыыта күүстээҕэ, дьонум туһугар, түөлбэм туһугар диэччи элбэҕэ сүргэни көтөҕөр. “Хатас” ВК саҥа сүүрээн киирэн хаттаан сөргүтүллэн, иккис тыынын ылан араас таһымнаах күрэхтэргэ Хатаспыт аатын ааттатарга кыах толору баар эбит диэн буолла. Түөлбэлэр аайы күүстээх оонньооччулар баар буолан, олох туран хаалбыт оонньуу суоҕа көрөөччүгэ да, оонньооччуга даҕаны интэриэһи үөскэттэ, кыайыыттан үөрүүнү үрдэттэ. Волейболу спартакиада эрэ көрүҥүн курдук көрбөккө араас таһымнаах күрэхтэри, көрсүһүүлэри ыытыахха диэн этиилэр киирдилэр. Өссө биир үтүө көстүү, оскуола оҕолорун хомуур хамаандатын оонньуур таһыма буолла. Тренер Сергей Михайлович Андреев усулуобуйа суох диэн быар куустан олорботоҕо дьэҥкэтик көһүннэ.

Кыайыылаахтар маннык буоллулар:

Дьахталларга – “Маҥнайгы Баҕарах” хамаандата бастаата, иккиһи эрбии тииһин курдук киирсэн “Туймаада”, онтон үсүһү “Моисеевка” ылан  түөлбэлэрин  олохтоохторун, салайааччыларын бииргэ түмтүлэр, сомоҕолоотулар.

Эр дьоҥҥо – кыһыл көмүс мэтээл “Киэҥ хочо” уолаттарын түөһүн киэргэттэ, үрүҥ көмүс мэтээли Малгиннар ыллылар уонна үһүс миэстэ буоланнар боруонса мэтээли “Туймаада” уолаттара кыргыттарын кыайыыларын түһэн биэрбэтилэр. Дьэ онон спартакиада уопсай табылыыссатыгар “Байанай” күрэх кэнниттэн син да балайда уларыйыылар таҕыстылар, аныгыскы көрүҥҥэ кими киллэрэн балаһыанньаны тупсарабыт диэччи үксээтэ.

Наталья РУФОВА. Хатас.

Добавить комментарий

Ваш адрес email не будет опубликован. Обязательные поля помечены *

196903
Бүгүн : 276