Сонуннар

Бишкек-2024: Азия чемпионатыттан икки үрүҥ көмүс

Бишкек. Көҥүл тустууга Азия чемпионатын иккис күнэ. Бүгүн хаалбыт биэс ыйааһыҥҥа күрэхтэһии буолла. Онуоха саха тустууга кыһатын иитиллээччилэриттэн икки бөҕөс кытынна.

Өскөтүн бэҕэһээ, маннык улахан таһымнаах түһүлгэҕэ аан бастаан күүстэрин холонор Айаал Белолюбскай уонна Андрей Аронов миэстэҕэ киирбэтэх эбит буоллахтарына, бүгүн көбүөргэ биллиилээх, опыттаах тустууктарбыт таҕыстылар.

Ол курдук, 74 киилэҕэ Виктор Рассадин бастаан Сан Го Ханы (Соҕуруу Корея) 11:0, салгыы көбүөр хаһаайына Канат Керимбековы (Кыргызстан) 9:0 уонна финалга тахсар иһин киирсиигэ Арлсан Бегенжовы (Туркменистан) партерга араастаан эргитэн очукуонан ыраастык (14:4) хотто.

Айаал Лазарев (125 кг) бастакы эргииргэ сынньанна. Иккис эргииргэ кини, японец Ямомотоны хоппут Бехурдуну (Кытай) 10:6 ахсаанынан баһыйа тутта. Онтон финалга тахсар иһин тустууга монгол Одгерел Батшигигы аллараа охторон түһэрэн баран, «накат» диэн албаска эргитэлээн, 10:0 ахсаанынан кыайда.

Онон бүгүҥҥү күҥҥэ бөҕөстөрбүт иккиэн финалга таҕыстылар.

74 кг: Виктор Рассадин – Япония чемпиона Кота Такахашины кытта тустуутугар наһаа сэрэнэн туһунна. Иккис түһүмэххэ биир түгэҥҥэ атахха түһэн баран, утары хамсаныыга түбэһэн, бэйэтэ очко биэртэлээн кэбистэ. Түмүккэ 3:6 ахсаанынан хотторон хаалла. Хайдах эрэ кыаҕын туһаммакка, наһаа кэтэнэн кэбистэ дуу, хайдах? Кини – кимэн киирэр, элбэх албастаах бөҕөһүнэн биллэр ээ. Ол аата, дьоппуоннуун тустуутугар сыыһа тактиканан тустан хоттордо диэххэ сөп. Викторга эрэл улахан этэ…

125 кг: Айаал Лазарев финалга аан дойду икки төгүллээх чемпиона, Олимпиада призера иранец Амир Зареҕа 0:11 ахсаанынан хотторон кэбистэ. Манна иранец икки төгүл атахха киирэн суулларан баран, тута “накатка” эргитэн сүүйүүлээх бааллары ылла. Бу тустуутунан Айаал Азия чемпионатыттан алтыс мэтээлин ылла (1 кыһыл көмүс, 2 үрүҥ көмүс, 3 боруонса). Итинэн кини спорка биир тэҥ үчүгэй көрдөрүүлээх уһун үйэлэнии үтүө холобурун көрдөрдө.

Онон Азия быйылгы чемпионатыгар саха тустууга кыһатын иитиллээччилэрэ Виктор Рассадин (тренерэ А.К. Константинов) уонна Айаал Лазарев (тренерэ И.Н. Сивцев) бэйэлэрин ыйааһыннарыгар иккис миэстэҕэ тахсан, үрүҥ көмүс мэтээллэринэн наҕараадаланнылар. Эҕэрдэлиибит!

«Дьулурҕан».  

 

Добавить комментарий

Ваш адрес email не будет опубликован. Обязательные поля помечены *

196899
Бүгүн : 272