Сонуннар

Бөҕөстөрбүт Азия чемпионатыгар

Сарсыҥҥыттан Кыргызстан киин куоратыгар Бишкеккэ спортивнай тустууга Азия чемпионата саҕаланар. Күрэхтэһиини бастакынан эр дьон көҥүл тустууга саҕалыыллар.

Саха тустууга кыһатыттан бу түһүлгэҕэ түөрт бөҕөс кыттар.

57 киилэҕэ 15 киһи сэрэбиэйи ааспыт. Биһигиттэн Таджикистан чемпиона Айаал Белолюбскай иккис бөлөххө Ким диэн Хотугу Корея бөҕөһүн кытта тустар буолбут. Кыттааччылартан көрдөххө, манна казах Картбай, кыргыз Сманбеков, монгол Занданбуд, иранец Хари курдук биллэр бөҕөстөр бааллар.

74 кг ыйааһыҥҥа 16 кыттааччы баар. Манна биһиги эрэлбит, Таджикистан чемпиона Виктор Рассадин иккис бөлөххө тустар. Кини бастакы утарсааччыта – Хан (Соҕуруу Корея). Салгыы, кыргыз Керимбеков – монгол Батсух пааратын кыайыылааҕын кытта көрсүөн сөп.

Ылан көрдөххө, бу ыйааһыҥҥа сэрэбиэй быһыытынан Иран, Япония, Казахстан, Индия бөҕөстөрө бастакы бөлөххө киирбиттэр.

97 киилэҕэ Кыргызстан икки төгүллээх чемпиона Андрей Аронов бастакы эргииргэ былырыыҥҥы аан дойду чемпионатын 92 киилэҕэ кыайыылааҕа казах Ризабек Айтмуханы кытта көрсөр буолбут. Бу ыйааһыҥҥа 11 бөҕөс сэрэбиэйи ааспыт. Күүстээхтэртэн үөһэ ахтыллыбыт Айтмуханы тэҥэ аан дойду чемпиона Тажудинов (Бахрейн), Мохаммадиан (Иран) бааллар.

Саамай ыарахан ыйааһыҥҥа эмиэ 11 бөҕөс кыттар. Биһиги биллиилээх бөҕөспүт Айаал Лазарев рейтининэн иккис киһи буолан, аллараа бөлөххө туруоруллубут. Кини финал чиэппэригэр Кытай-Япония пааратын кыайыылааҕын кытта көрсүө. Онно кыайдаҕына салгыы күрэхтэһиигэ Узбекистан, эбэтэр Монголия тустууктарын кытта киирсиэн сөп.

Чэ, бөҕөстөрбүт Азия чемпионатыгар кимнээҕи кытта тусталларын билиһиннэрдэххэ итинник. Санатан эттэххэ, бу чемпионакка олимпийскай путевка оонньоммот. Олимпиадаҕа сүүмэрдиир Азия континенын күрэхтэһиитэ муус устар 19-21 күннэригэр эмиэ Бишкеккэ буолар

Чемпионат муус устар 11 күнүгэр Дьокуускай бириэмэтинэн күнүс 14:00 чаастан саҕаланар. Күрэхтэһии хаамыытын биһиги dzulurgan.ru сайтпытыгар билсиэххитин сөп.

«Дьулурҕан».

Добавить комментарий

Ваш адрес email не будет опубликован. Обязательные поля помечены *

196907
Бүгүн : 280