Сонуннар

Таһым уонна үөрүйэх быһаарыа

Бу күннэргэ Александрия куоракка (Египет), спортивнай тустууга Африка уонна Океания дойдуларын Парижтааҕы Олимпиадаҕа сүүмэрдиир күрэхтэһиилэрэ ыытыллар.

Бу күрэхтэһиигэ биһиги биир дойдулаахпыт Георгий Окороков (65 кг) бастакы эргииргэ Камерун бөҕөһүн кытта киирсэр.

Күрэхтэһии кыттыылаахтарын сэрэбиэйин көрдөххө, 65 киилэҕэ барыта 16 бөҕөс киирбит. Кинилэр бары анал сүүмэрдээһини ааһан, Олимпиадаҕа кыттар путёвка иһин тустуохтара. Ылан көрдөххө, рейтинг быһыытынан Симон Изоло (Нигерия), Нкунга Нгонда (Ангола), Георгий Окороков (Австралия), Омар Мохамед Амин Мурад (Египет) сэрэбиэйдээһиҥҥэ араарыллыбыттар. Холобур, Окороков бөлөҕөр Нконда баар.

Соторутааҕыта Аккраҕа (Гана) ыытыллыбыт Африка дойдуларын оонньууларыгар 65 кг Омар Мохамед Амин Мурад бастаабыта, Симон Стефан Изоло иккис, Нкунга Нгонда уонна Мохамед Бен Хафсиа (Тунис) үһүс буолбуттара. Онтон биһиги уолбут олунньуга Гуамҥа ыытыллыбыт Океания чемпионатыгар тэҥнээҕин булбатаҕа.

Олимпиадаҕа кыттыан баҕалаах элбэх эбит. Сетканы көрдөххө, Океания быйылгы чемпионатын 70 киилэҕэ кыайыылааҕа Николеску (Палау) уонна 74 кг ыйааһыҥҥа иккис буолбут Бингхэм (Науру) ох курдук оҥостон, олимпиец аатын ылаары элбэх ыйааһыны түһэринэн 65 киилэҕэ күүстэрин холонорго санаммыттар.

Манна эбэн билиһиннэрдэххэ, Георгий Окороков сааһа 27-тэ, Амма тустууга кыһатын иитиллээччитэ, көҥүл тустууга норуоттар икки ардыларынааҕы кылаастаах спорт маастара. Бэйэтин саастыылаахтарыгар Россияҕа үстэ миэстэлэһэ сылдьыбыта, 2016 с. Европа эдэрдэргэ күрэхтэһиитигэр кыайбыта. Иллэрээ сылтан Австралия чиэһин көмүскүүр. Бу дойду икки төгүллээх чемпиона.     

Ырытан, сылыктаан көрдөххө, көбүөр хаһаайына Мурад, биһиги Георгий Окороковпыт уонна былырыыҥҥыттан Самоа дойдутуттан кыттар дьоппуон Гаку Аказава – тустар таһымнара, дьарыктанан кэлбит үөрүйэхтэрэ атын утарсааччыларыттан ордук курдук. Чэ, көбүөр көрдөрүө…

Норуоттар икки ардыларынааҕы Олимпийскай комитет (МОК) спорт көрүҥнэрин тэҥҥэ сайыннарар инниттэн Олимпиадаҕа сүүмэрдээһиҥҥэ континеннарга кыах биэрбитэ. Ол курдук, спортивнай тустууну ылан көрдөххө, холобур Олимпийскай оонньууларга Африка-Океания дойдуларыттан холбоон иккилии спортсмен кыттара быһаарыллыбыта. Ааспыт, Токиотааҕы оонньууларга 65 киилэҕэ Сенегалтан Адама Диатта уонна Тунистан Дахлаоуи сүүмэрдээһини ааһан кыттыбыттара. Диатта диэбиккэ дылы, Александрия көбүөрүгэр Диатта эмиэ баар, ол эрээри, атын Диатта – Сильвио…

Эр дьон көҥүл тустууга күрэхтэһиитэ кулун тутар 24 күнүгэр ыытыллар. Икки финалистар олимпийскай путевка ылыахтара.

# Георгий, кытаат!

Дьулурҕан.

Добавить комментарий

Ваш адрес email не будет опубликован. Обязательные поля помечены *

160225
Бүгүн : 125