Сонуннар

Сүгүрүйүү бэлиэтэ

Бүгүн, кулун тутар 7 күнүгэр – сахаттан бастакы олимпийскай чемпион, ССРС спордун үтүөлээх маастара, Советскай Союз уонна Российскай Федерация үтүөлээх тренерэ Роман Михайлович Дмитриев төрөөбүт күнэ. Баара эбитэ буоллар, кини 75 сааһын үөрэ-көтө бэлиэтиэ этэ.

Ол да буоллар, саха норуота чулуу уолун умнубат! Хас сыл ахсын бу күҥҥэ кини мэҥэ бэлиэтигэр түмсэн, ытыктабылларын биллэрэллэр, кэриэстииллэр, ахтан-санаан ааһаллар. Быйылгы сыл уратылаах, үбүлүөйдээх бэлиэ түгэн.

Бу күннэргэ улуу киһибит үбүлүөйдээх тэрээһиннэрэ үрдүк тэрээһиннээхтик ыытылыннылар. Онно Роман Михайловиһы билэр, кини талааныгар сүгүрүйэр сүүһүнэн киһи тоҕуоруһа мустан, бэйэлэрин ытыктабылларын биллэрдилэр.

Киин куорат Комсомольскай болуоссатыгар баар Роман Михайлович Дмитриевкэ анаан оҥоһуллубут сквергэ буолбут бэлиэ түгэҥҥэ Саха Правительствотын председателин солбуйааччы Сергей Местников, Ил Түмэн депутата Георгий Балакшин, олимпийскай чемпион Павел Пинигин, РФ спортивнай тустууга федерациятын толорооччу дириэктэрэ Роман Гайдуков, Р.М. Дмитриев төрөппүт кыыһа Марина Крылова тыл эттилэр, ахтыы оҥордулар.

Сиэр-туом быһыытынан, маннык бэлиэ күҥҥэ Роман Михайлович пааматынньыгар сибэкки дьөрбөтүн ууруу буолла. Тэрээһиҥҥэ Москваттан кэлбит бочуоттаах ыалдьыттар: көҥүл тустууга спорт үтүөлээх маастара Сергей Корнилаев, Р.М. Дмитриев кэргэнэ Антонина Дмитриева, оҕолоро Анна, Александр, Марина, Роман Дмитриевтэр, норуоттар икки ардыларынааҕы категориялаах судьуйа Сослан Засеев, уо.д.а. кытыннылар.

Петр ПАВЛОВ.

Ааптар хаартыскаҕа түһэриилэрэ.   

Добавить комментарий

Ваш адрес email не будет опубликован. Обязательные поля помечены *

201748
Бүгүн : 31