Сонуннар

Пресс-конференцияҕа туох туһунан кэпсэттилэр?

Бу күннэргэ Роман Михайлович Дмитриев 75 сылынан республикабыт киин куоратыгар элбэх улахан таһымнаах тэрээһиннэр ыытылыннылар. Олортон биирдэстэринэн, олохтоммут үгэс быһыытынан, Бэчээт дьиэтигэр Р.М. Дмитриев кэриэһигэр көҥүл тустууга эдэрдэргэ норуоттар икки ардыларынааҕы турнир иннинээҕи пресс-конференция буолла.

Манна РФ спортивнай тустууга федерациятын көҥүл тустууга штабын начальнига, спорт үтүөлээх маастара Петр Юмшанов, СР физическэй култуураҕа уонна спорка министрэ Леонид Спиридонов, бочуоттаах ыалдьыттар: Москватааҕы Олимпиада боруонса призера, аан дойду 4 төгүллээх чемпиона, спорт үтүөлээх маастара Сергей Корнилаев, Р.М. Дмитриев оҕолоро Анна уонна Александр Дмитриевтэр кыттыыны ыллылар.

Тэрээһини Р.М. Дмитриев аатынан Олимпийскай эрэл училищетын дириэктэрэ Семен Чердонов салайан ыытта.

Кылгастык пресс-конференцияҕа туох туһунан кэпсэтии барбытын билиһиннэрдэххэ, Леонид Спиридонов быйылгы Х турнирга 12 тас дойдуттан уонна Россия 16 регионуттан спортсменнар кэлбиттэрин эттэ. Итиэннэ бастатан туран, бу турнир үрдүк таһымнаахтык ыытылларыгар Россия Спорка министерствота, Россия спортивнай тустууга федерацията улахан өҥөлөөхтөрүн ыйда.

Петр Юмшанов, турнирга кыттар Россия сүүмэрдэммит хамаандата сарсын сарсыарда кэлэрин, хамаанданы биллиилээх бөҕөс уонна тренер Зелимхан Гусейнов салайан аҕаларын, бу састаап эдэрдэргэ Европа уонна аан дойду күрэхтэһиилэригэр кыттарга бэлэмнэнэрин эттэ.

Онтон бочуоттаах ыалдьыт Сергей Корнилаев: «Саха сиригэр кэлбиппиттэн астынабын. Саха сирэ – тустуулаах регион. Олимпийскай чемпионнар Роман Дмитриев, Павел Пинигин ааттара аан дойдуга киэҥник биллэр. Тустарбыт саҕана биһиги төһө да биир хамаанда, куорат чиэһин көмүскүүрбүт үрдүнэн Романныын күөн көрсүүбүт куруук наһаа тыҥааһыннаах буолара. Ханныгын да иһин сүрүн утарсааччылар буоллахпыт. Көбүөргэ сирэй көрсүүбүт ахсаана 2:2. Онтон тустан бүтэн баран, иккиэн тренеринэн үлэлээбиппит. Мин дойду уолаттарга сүүмэрдэммит хамаандатын, Роман Михайлович эдэрдэргэ сүүмэрдэммит хамаандатын салайбыппыт. Дьэ, ол кэмҥэ биһиги бэйэбит икки ардыбытыгар туох да кистэлэҥэ суох, бэйэ-бэйэбитигэр көмөлөсүһэн бииргэ үлэлээбиппит. Элбэхтик кэпсэтэр, күрэхтэһиилэргэ, сбордарга бииргэ сылдьар, доҕордуу сыһыаннаах этибит», – диэн эттэ.

Анна Романовна, аҕатын туһунан этиитигэр, Саха сирэ тыйыс айылҕалаах буолан, хорсун уонна тулуурдаах, олоххо дьулуурдаах дьон олороллорун аҕынна. Кытаанах айылҕаттан иитиллэн-такайыллан, спорка күүстээх спортсменнар тахсаллар диэтэ. Итиэннэ Роман Михайлович булчут удьуора буолан – көбүөргэ тустарыгар да, күннээҕи олоҕор даҕаны сүрдээх мындыр тактик буоларын ыйда.

Тэрээһин түмүгэр Семен Чердонов кыайыылаахтар уонна иккис-үһүс миэстэлээхтэр тугунан наҕараадаланалларын көрдөрөн билиһиннэрдэ. Ол курдук, кыайыылаахтар 4 киилэ ыйааһыннаах сиэдэрэй оҥоһуулаах Чемпионнар курдарынан, Р.М. Дмитриев сэбэрэтэ ойуулаах кыраһыабай мэтээллэринэн уонна түһүлгэ ымыыта буолбут Барс бириистэринэн наҕараадаланалларын эттэ.

Спорду таптааччылар, тустууну сэҥээрээччилэр! Кулун тутар 8-10 күннэригэр “Өрөгөй” Спорка киинигэр күргүөмүнэн көхтөөхтүк кэлэн бастакы олимпийскай чемпиоммут Роман Михайлович Дмитриев аатыгар Сүгүрүйүөҕүҥ, Саха сиригэр тустууну хайдах курдук таптыылларын Көрдөрүөҕүҥ, бэйэбит уолаттарбытыгар Ыалдьыаҕыҥ!..

Петр ПАВЛОВ.

Ааптар хаартыскаҕа түһэриитэ.        

Добавить комментарий

Ваш адрес email не будет опубликован. Обязательные поля помечены *

160229
Бүгүн : 129